„გვაქვს მჭიდრო თანამშრომლობა აშშ-შიც და ევროპაშიც მაგრამ ღიმილისმომგვრელია დასავლური დაფინანსების შესაძლებლობები. ნუ ექნებათ ილუზია, რომ ახალი შემოთავაზებებით, რუსული ფოჩებიანი კანფეტებით ყველაფერი მოგვარდება“. ამის შესახებ „თავისუფალი დემოკრატების“ მდივანმა ალექსი პეტრიაშვილმა „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„ამ არჩევნებზე მკაფიოდ არის გამოკვეთილი საგარეო ვექტორის მნიშვნელობა. თუმცა გაიმარჯვებენ ევროატლანტიკური მისწრაფებების მქონე პარტიები. ისინი იქნებიან უმარველსობაში იმიტომ, რომ ასეთია საქართველოს მოსახლეობის არჩევანი. 80 % უჭერს მხარს საქართველოს ევროკავშირში ინტეგრაციას. უვიზო მიმოსვლა მიუხედავად ბევრი შეცდომისა, ჯანსაღი პოლიტიკური ძალების კონსოლიდაციის საკითხია. თუ ეს მოხდება გიორგი კვირიკაშვილის მთავრობის დროს, ბუნებრივია მივესალმები.
„ცენტრისტები“ საუბრობენ ღიად შოიგუსთან მოლაპარაკებაზე. ეს არის ადამიანი,რომელსაც აფხაზეთთან მიმართებით ძალიან მძიმე რეპუტაცია აქვს. რუსეთის ხელისუფლება ჯარისკაცების ხელით მეკობრეებივით იტაცებს ჩვენს მოქალაქეებს. მიუხედავად ამისა გული იქეთ მიუწევთ. ვერაფრით შევიდა მათ თავში, რომ 37 მანეთიანი გაფრენა და საბჭოთა კავშირი ვეღარ აღდგება. საუბარი აუცილებელია, მაგრამ დღეს ამ საუბარს არავითარი აზრი არ აქვს უმაღლეს დონეზე. ერთგვარი კონკურსია, პოდიუმზე არიან გამოსულები,რომ მიიღონ სპეციალური დაფინანსება. ტყუილად ნუ გაირჯებიან. რეალურად 1%-ს თუ შეეთამაშებიან, ისიც დიდი გაჭირვებით. ეს განწირულია კრახისთვის,“ – განაცხადა ალექსი პეტრიაშვილმა.
მანანა ღოღობერიძე
