ვატიკანის ოფიციალური საიტი ავრცელებს რომის პაპის კავკასიური ტურნეს პროგრამას, სადაც აღნიშნულია, რომ 30 სექტემბერს პაპი ფრანცისკე თბილისს ეწვევა.
დაახლოებით 15:00 საათზე იგი შეხვდება საქართველოს პრეზიდენტს, პრეზიდენტის სასახლეში, აქვე იგი მიესალმება დიპლომატიური კორპუსის წარმომადგენლებს. შემდეგ, გაიმართება შეხვედრა საპატრიარქოში კათოლიკოს პატრიარქ ილია მეორესთან. ხოლო დღის დასასრულს ეწვევა ასირო-ქალდეური წესის კათოლიკეთა წმ. სიმონის სახელობის ეკლესიას.
პაპი ფრანცისკე 1 ოქტომბერს მიხეილს მესხის მოედანზე გამართავს მესსას და შეხვედრა საქართველოს კათოლიკე მრევლს, ხოლო წირვის დასრულების შემდეგ მარიამის ზეცად აღყვანების საკათედრო ტაძარში იგი შევხდება კათოლიკე სასულიერო და საერო პირებს. შემდეგ გაემგზავრება წმ. კამილოს ცენტრში. საქარტველოში ვიზიტის დასასრულს მოინახულებს ქალაქ მცხეთასა და სვეტიცხოვლის ტაძარს.
2 ოქტომბერს პაპი ფრანცისკე გაემგზავრება ბაქოში, რითაც დაასრულებს სამხრეთ კავკასიის ტურნე.
რომის პაპი კათოლიკური ეკლესიისა და ვატიკანის სახელმწიფოს მეთაურია. რელიგიური ტრადიციის მიხედვით იგი ითვლება მოციქულ პეტრეს მემკვიდრედ, ქრისტეს წარმომადგენლად და ეკლესიის წინამძღვრად. 2013 წლის 13 მარტიდან ვატიკანს და სრულიად კათოლიკურ სამყაროს რიგით 266-ე პაპი არგენტინელი კარდინალი, ბუენოს-აირესის არქიეპისკოპოსი ხორხე მარიო ბერგოლია უდგას სათავეში. სახელი ფრანცისკე თავად აირჩია „ფრანცისკანელთა ორდენის დამაარსებელი“ ფრანცისკე ასიზელისაგან. იგი პირველი იეზუიტი პაპია ამერიკის სუბკონტინენტიდან. არჩევიდან მცირე ხანში ”ხალხის პაპის” სახელწოდება მიიღო, ხოლო 2013 წელს ჟურნალმა Time-მა წლის ადამიანად დაასახელა.
ორგანიზაცია „გელაფ ინთერნეიშენალის“ მიერ მსოფლიოს 64 ქვეყანაში ჩაატარებული სოციალური კვლევის მიხედვით მსოფლიო ლიდერებს შორის ყველაზე პოპულარული ადამიანი რომის პაპია.
გამოკითხვების თანახმად, კათოლიკეების გარდა, რომის პაპი პოპულარულია პროტესტანტებში, ათეისტებსა და აგნოსტიკოსებშიც. პაპ ფრანცისკეს მიმართ კეთილგანწყობას ყველაზე მეტად ლათინური ამერიკის ქვეყნებში გამოხატავენ, ასევე, ევროკავშირის სახელმწიფოებში, განსაკუთრებით კი იტალიასა და პორტუგალიაში.
ყველაზე მცირე რეიტინგი პაპს თურქეთში, ტუნისსა და ალჟირში აქვს. ხოლო აზერბაიჯანში ამბობს, რომ პაპის შესახებ მათთვის თითქმის არაფერია ცნობილი.
სოფიკო ნინიკაშვილი
