თბილისის საერთაშორისო თეატრალური ფესტივალი წელს მერვედ, 24 სექტემბერიდან 8 ოქტომბრის ჩათვლით ჩატარდება.
როგორც „თბილისი ტაიმსს“ კულტურის სამინისტროდან აცნობეს, თბილისის მერიაში თბილისის საერთაშორისო თეატრალურ ფესტივალთან დაკავშირებით პრესკონფერენცია დღეს გაიმართება. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე, ქალაქ თბილისის მერი დავით ნარმანია და ფესტივალის დირექტორი ეკატერინე მაზმიშვილი გაუძღვებიან.
პრესკონფერენციაზე ფესტივალის პროგრამის პრეზენტაცია გაიმართება.
სამინისტროს განცხადებით, თეატრალური ფესტივალის საერთაშორისო პროგრამით უცხოური თეატრების წარმოდგენები 24 სექტემბერიდან 6 ოქტომბერის ჩთვლით გაიმართება; „პროგრამა New“ – 27 სექტემბერიდან – 1, 3 ოქტომბერის ჩთვლით, ხოლო ქართული სპექტაკლების ჩვენება პროგრამით 4 – 8 ოქტომბერს მოხდება.
ფესტივალის ფარგლებში ასევე დაგეგმილია გამოფენების, ვორქშოფებისა და სემინარების მოწყობა.
24 სექტემბრიდან თბილისის ქუჩებსა და სხვადასხვა თეატრში მაყურებელი იხილავს ინდოეთის, პოლონეთის, უკრაინის, დიდი ბრიტანეთის, გერმანიის, რუსეთის, სომხეთის, იაპონიის თეატრების დადგმებს.
წელს ფესტივალი პირველად წარმოდგენებს ღია ცის ქვეშ გამართავს.
ფესტივალის კლუბი ფესტივალის მონაწილეებსა და მაყურებელს ყოველ საღამოს განსაკუთრებული და მრავალფეროვანი პროგრამით უმასპინძლებს.
