ირაკლი ოქრუაშვილი აცხადებს, რომ მისი მისამართით ალექსანდრე ინდუაშვილმა გაისროლა,- ამის შესახებ ირაკლი ოქრუაშვილმა ჟურნალისტებს გორში განუცხადა.
როგორც ირაკლი ოქრუაშვილმა აღნიშნა, დღეს დილით ამომრჩევლებთან შეხვედრები გქონდა და „ქართული ოცნების“ კოორდინატორი, ვინმე ედუარდ ნუცუბიძე დილიდანვე ცდილობდა შეხვედრების ჩაშლას.
„ედუარდ ნუცუბიძეს რომ არაფერი გამოუვიდა, მოიყვანა მკვლელობაზე და ყაჩაღობაზე არაერთგზის ნასამართლევი, ვინმე ალექსანდრე ინდუაშვილი, რომელიც ცნობილი კრიმინალია გორში. მასაც ჰქონდა სურვილი შეხვედრის ჩაშლის, მიუხედავად იმისა, რომ ჩემი დაცვის წევრებმა რამდენჯერმე კორექტულად მიუთითეს, ბოლოს მან ამოიღო იარაღი და რამდენიმე მიზანმიმართული გასროლა განახორციელა, როგორც ჩემს მიმართ, ისე ჩემი დაცვის წევრების მიმართ“, – განაცხადა ოქრუაშვილმა.
მისივე თქმით, გორში ბოლო პერიოდში შეინიშნებოდა ე.წ. ძველი ბიჭების გააქტიურება.
„ამ ყველაფერის თავი და თავი გახლდათ კახა კალაძის ცოლის ძმა, რომელიც ორგანიზებას უკეთებდა ასეთი ადამიანების აქტიურობას. ის აძლევდა გარანტიას, რომ მათ არავინ შეეხებოდათ, ისევე როგორც ის უკეთებდა ორგანიზებას კრიმინალურ ავტორიტეტების მიერ გორელი ახალგაზრდებისათვის ზარების განხორციელებას. მე არ ვაპირებ ამ ადამიანის ჩემი ძალებით ძიებას, მიუხედავად იმისა, რომ ამის დიდი სურვილი მაქვს“, -აღნიშნა ოქრუაშვილმა.
ოქრუაშვილი აცხადებს, რომ დაელოდება პოლიციის მუშაობას.
„პოლიციას აქვს მცირე დრო, რადგან ჩემი ინფორმაციით, ეს ადამიანი აპირებს საქართველოს დატოვებას ცხინვალის გავლით. კახა კალაძის ეს ქმედება, მისი ცოლისძმის ჩართვა პროცესში, არის გამომწვევი მიზეზი ამ დაუსჯელობის სინდრომის. თუ საარჩევნო პროცესი უნდა იმართოს ე.წ. კარგი ბიჭების მიერ, ეს კარგს არაფერს მოუტანს „ქართულ ოცნებას“,- განაცხადა ოქრუაშვილმა.
