„ „რუსთავი-2“-ის ეგზითპოლებს ნამდვილად ვერ ვენდობით, ეს არის პარტ-ტელევიზია და ეს ორი დღის წინაც გამოჩნდა.იმედს ვიტოვებ,რომ სხვა მაუწყებლებზე გასული ეგზითპოლები მეტ-ნაკლებად ასახავენ რეალობას“. ამის შესახებ „ქართული ოცნების“ მაჟორიტარი დეპუტატობის კანდიდატმა სოფო კილაძემ „ტვ-პირველზე“, გადაცემა „ვახო სანაიას დღოს ამბების“ ეთერში ისაუბრა.
„ეს არ არის დამოუკიდებელი მედია- ორგანიზაცია,რომელიც ინფორმაციას ობიექტურად აშუქებს. ამას თვითონაც აღარ მალავენ და ხელისუფლებას ღიად უპირისპირდებიან. ობიექტურობას თითქმის გამოვრიცხავ „რუსთავი-2“-ის შემთხვევაში.
ჩვენი ხელისუფლება ყველაფერს გააკეთებს იმისთვის,რომ ის დემოკრატიული მიღწევები, რომლებიც აქვს ჩვენს ქვეყანას 2012 წლის შემდეგ, შევინარჩუნოთ და კიდევ უფრო გავაძლიეროთ. ამისათვის ვაკეთებთ ყველაფერს კანონის ფარგლებში. ეს მაძლევს იმედს,რომ შენარჩუნებული იქნება ის მშვიდი გარემო,რომლითაც „ქართული ოცნება“ აქამდე მოვიდა. ხელისუფლების ამ ძალისხმევას უპირისპირდება ბოლო პერიოდის მოვლენები.
ეჭვი მაქვს რომ ეს ინციდენტები აწყობს იმ პოლიტიკურ ძალას,რომელიც მთელი წლების განმავლობაში იყო ძალადობრივი ხელისუფლება. ეს რეჟიმი 2012 წელს დასრულდა. ეს არის სწორედ ის ძალა,რომელსაც აწყობს ქვეყანაში დესტაბილიზაცია. თუმცა რა თქმა უნდა ისინი ამას ვერ მოახერხებენ. ვერ მოახერხებენ არეულობა შექმნან. ეს დესტაბილიზაცია არის მხოლოდ და მხოლოდ „ნაციონალური მოძრაობის“ ინტერესებში. „ქართულ ოცნებას“ აქვს მაღალი რეიტინგი ყველა სხვა პარტიასთან შედარებით და ჩვენს ინტერესში არეულობა ნამდვილად არ შედის.
რამდენიმე დღის წინ ჩვენი მეგობარი და პარტნიორი ქვეყნის, ამერიკის შეერთებული შტატების ელჩმა გააკეთა მნიშვნელოვანი და ყურადსაღები განცხადება,რომ ძალიან მშვიდი და დემოკრატიული გარემოა ქვეყანაში.ამას აღნიშნავენ ობიექტური დამკვირვებლებიც. ეს რა თქმა უნდა პირველ რიგში ჩვენი ხელისუფლების დამსახურებაა ქართულ საზოგადოებასთან ერთად. ჩვენს ქვეყანას მოსწყინდა ძალადობა. დაუშვებელია ქართველი ხალხი შეეგუოს იმ რეჟიმს,რომელიც იყო 2012 წლამდე.
ბოლო პერიოდის ინციდენტები, იგივე მანქანის აფეთქების შემთხვევა იქნება გამოძიებული, თუმცა რა თქმა უნდა ჭეშმარიტების დადგენას დრო სჭირდება. ამგვარი მნიშვნელოვანი საქმეების ერთ ან ორ დღეში გამოძიება რთულია. თუ შევადარებთ 2012 წლის წინასაარჩევნო გარემოს, მგონი კითხვებიც არ ჩანს. მაშინ ხელისუფლება თვითონ იყო მოძალადე, თვითონ დევნიდა პოლიტიკურ ოპონენტებს, განსხვავებული აზრის მქონე ადამიანებს და ეს იყო სისტემური ხასიათის. ჩვენ შემთხვევაში ხელისუფლება პირიქით ყველაფერს აკეთებს,რომ გარემო იყოს მშვიდი,“-განაცხადა სოფო კილაძემ.
მანანა ღოღობერიძე
