„ „ქართული ოცნება“ ჩვენგან არ უნდა ელოდეს არც გაჩუმებას, არც პრობლემებზე თვალის დახუჭვას. ის, რომ მხოლოდ 27 ვართ, ხელს ნამდვილად არ გვიშლის. ერთი, რაც ნამდვილად არ ვიქნებით, ეს არის კომფორტული ოპოზიცია. ამის პირობა შემიძლია ნებისმიერს მივცე“. ამის შესახებ პარლამენტის ვიცე–სპიკერმა, „ერთიანი ნაციონალური მოძრაობის“ წევრმა სერგი კაპანაძემ „ტვ პირველზე“, გადაცემა „ვახო სანაიას დღის ამბების“ ეთერში ისაუბრა.
„დღევანდელი სესია იყო ცერემონიული, თუმცა გამოვიყენეთ ეს შესაძლებლობა, რომ გვესაუბრა ყველა მნიშვნელოვან პოლიტიკურ თემაზე. ამ ტიპის ოპონირება არის ჯანსაღი. ჩვენ არ წარმოვადგენთ მხოლოდ ნახევარ მილიონ ამომრჩეველს. როგორც ჩანს „ქართული ოცნება“ კვლავ აპირებს სადღეგრძელოების ტიპის განცხადებების გაკეთებას, თითქოს ყველაფერი კარგად არის. მორჩა საუბარი ცხრა წელზე, როდესაც საუბარი არის ოთხ წელზე. მათ ერთი ვადა უკვე მოიხადეს და ბევრი ჩავარდნა ჰქონდათ. სასაცილოა საუბარი იმაზე თუ რა ხდებოდა ოთხი წლის უკან. ამ ტიპის საკონსტიტუციო უმრავლესობით მათ წასძლევთ სული რომ არ ისაუბრონ რეალურ პრობლემებზე. ჩვენ აქ ვიქნებით იმისთვის, რომ შევუქმნათ დისკომფორტი.
რაც შეეხება ირაკლი კობახიძის კანდიდატურას, ეს უმრავლესობის გადასაწყვეტი იყო და ნებისიერ შემთხვევაში წარმატებას ვუსურვებთ. თუმცა არა მგონია, რომ ეს იყოს წარმატებული პარლამენტი, წარმატებული უმრავლესობა. ამ ეტაპზე ჩვენი ვალია იმედი გამოვთქვათ, რომ ეს ორგანო ქვეყნის სასარგებლოდ იმუშავებს.
არ მინდა, რომ ბოროტი სურვილი გამომივიდეს, მინდა რომ ამ პარლამენტს ბევრი წარმატება ჰქონდეს, მაგრამ სკეპტიციზმის საფუძველს რამდენიმე მიზეზი მაძლევს. პირველი ის, რომ ამ საპარლამენტო უმრავლესობას არ გამოუხატავს ხედვა არც ერთ მნიშვნელოვან პოლიტიკურ საკითხზე, რეალურად არ ვიცით რის გაკეთებას აპირებენ. ეს არის უმრავლესობა, რომელიც ერთ კონკრეტულ ადამიანს ემორჩიელბა, ეს არის არაფორმალური მმართველობის დამადასტურებელი ძალა და ეჭვი მეპარება, რომ ეს მოდელი იყოს წარმატებული,“–განაცხადა სერგი კაპანაძემ.
მანანა ღოღობერიძე
