„მიუხედავად იმისა, რომ სასამართლომ იგი გაამართლა, მე ცალსახად ვამბობ, რომ ჩაჩუას ჩადენილი აქვს სამსახურეობრივი გულგრილობა. მთავარი პრეტენზია ლევან ჩაჩუასთან არის, რომ მან დასკვანაში დაწერა, თითქოს თავის ქალა სუფთა იყო. ჩემთვის გასაგებია რატომაც დაწერა, მას უბრალოდ ასეთი დავალება ჰქონდა“. ზურაბ ჟვანიას საქმის ექსპერტ ლევან ჩაჩუას გათავისუფლების შესახებ გოგლა ჟვანიამ „რუსთავი 2“–ზე, გადაცემა „არჩევანის“ ეთერში ისაუბრა.
„ჩემი პრეტენზიების მთავარი ადრესატი ლევან ჩაჩუა არასოდეს ყოფილა, მის არც ერთ პროცესს არ დავსწრებივარ. მეტად მნიშვნელოვანია, რომ დადგინდეს ჩემი ძმის გარდაცვალების გარემოებები. გამოიჩინა თუ არა გულგრილობა სამსახურეობრივი მოვალეობის შესრულების დროს ჩაჩუამ, რომელიც ექსპერტიზას ატარებდა, ჩემი ძმის გარდაცვალების გარემოებებს არ ცვლის.
2005 წელს, როდესაც ჩემი ძმა და რაულ უსუპოვი გარდაიცვალა, მან ჩაატარა ექსპერტიზა და უახლოეს პერიოდში დაწერა დასკვნა. 2012 წელს, მას შემდეგ რაც შეიცვალა ხელისუფლება, მთავარი პროკურორის, ზოდელავას სეიფში აღმოჩნდა საინტერესო ვიდეო ფირი, ეს უკვე ჩადებულია საქმეში და ასახავს იმ ექსპერტიზას, რომელიც მიმდინარეობდა პროზექტურაში ლევან ჩაჩუას მიერ. ამ ვიდეო ფირის გაშიფვრის შემდეგ საინტერესო ფაქტები გამოაშკარავდა. გამოჩნდა ზურას დაზიანებები თავის არეში და სისხლჩაქცევები კანზე. მთელი ექსპერტიზის განმავლობაში ის ახლოს არ მიდის ცხედართან. ეს არის აშკარა სიყალბე და გაუგებარია სასამართლოში სათანადოდ რატომ ვერ დასაბუთდა,“–განაცხადა გოგლა ჟვანიამ.
მანანა ღოღობერიძე
