საკონსტიტუციო კომისიის ფორმატი არავითარ კითხვის ნიშნებს არ ტოვებს, წლის ბოლომდე კომისია მუშაობას შეუდგება,- ამის შესახებ ჟურნალისტებს პარლამენტის თავმჯდომარემ, ირაკლი კობახიძემ განუცხადა.
მისივე თქმით, გარკვეულ დეტალებზე შეთანხმება შედგა და დადგენილების პროექტს იურიდიულ კომიტეტზე კენჭი ეყარა.
“უახლოეს მომავალში სახელმწიფო საკონსტიტუციო კომისია შეიქმნება და წლის ბოლომდე კომისია მუშაობას შეუდგება.მიმდინარე კვირის ხუთშაბათს დადგენილება სავარაუდოდ სესიაზე გავა და ხუთი დღის ვადაში, კანდიდატების წარმოდგენას შესაბამის სუბიექტებს ვთხოვთ, რაც იმის საშუალებას მოგვცემს, რომ კომისიის პირველი სხდომა წლის ბოლომდე გავმართოთ”,-აღნიშნა კობახიძემ.
მისივე თქმით, კომისიის ფარგლებში 60 ადამიანი იქნება ჩართული.
“ბუნებრივია, ვიმუშავებთ იმ იდეებს გავითვალისწინებთ, რომელიც წინა კომისიის ფარგლებში განხორციელდა. ასევე, ახალი იდეებიც იქნება, რომლებიც დამუშავდება. ფართო კონსენსუსის საფუძველზე კონსტიტუცია უნდა გადავსინჯოთ. დღევანდელ ტექსტში ბევრი ხარვეზია, რომელზეც ვენეციის კომისია გარკვევით საუბრობდა. ჩვენი ამოცანაა, კონსტიტუცია დავხვეწოთ და ისეთი სისტემა შევქმნათ, რომელიც დროს გაუძლებს,“-განაცხადა ირაკლი კობახიძემ.
