სწრაფი კვების ობიექტები დიდი პოპულარობით სარგებლობს. მსგავსი ობიექტი, საუკეთესო გამოსავალია დატვირთული დღის შემდეგ მსუბუქად წახემსებისთვის. ასეთ ობიექტებს სტუმრობენ, როგორც პატარები, ისე ზრდასრული ადამიანები…. ალბათ ყველა დამეთანხმება, რომ ძალიან მნიშვნელოვანია ყველა ასეთ ობიექტებში მომსახურე პერსონალის მაღალი დონის მომსახურება, მათი კლიენტებისადმი მიდგომა…. ჩვენს რეალობაში, სამწუხაროდ, ხშირად მომსახურე პერსონალი არა თუ მომღიმარი, არამედ უსიცოცხლო, დაღლილი სახეებით მოგვმართავს, ასევე გვხვდება ვიზუალურად მოუწესრიგებელი თანამშრომლებიც, ეს კი კლიენტისათვის, ჩვენთვის, როგორც მომხმარებლებისთვის მიუღებელია.
ჩემი ამ საკითხით დაინტერესება – თუ რაკრიტერიუმებით ხდება მსგავს ობიექტებში მომსახურე პერსონალის შერჩევა, განმაპირობა სოციალურ ქსელ – „ფეისბუკში“ დაწერილმა სტატუსმა:
“მენეჯერმა საუბრის ბოლოს მითხრა, რომ სამსახურში მიღებაზე სამწუხაროდ უარი უნდა ეთქვა, რადგან ცხვირზე პირსინგი მაქვს. მიზეზი ვკითხე, პასუხი ჩემთვის შეურაცხმყოფელი იყო: „იცი, არა ჰიგიენურია, საჭმელთან გიწევს შეხება“… ამ მიზეზს ვერ მოვიღებდი იმიტომ, რომ ჯერ ერთი, პირსინგი ისეთივე აქსესუარია, როგორც საყურე, რომლითაც „მაკდონადში“ მომსახურე პერსონალი ხშირად შემიმჩნევია. მეორე, არ მესმის საერთო რა აქვს პირსინგსა და ჰიგიენას, როცა სხვა სწრაფი კვების ობიექტებში მომსახურე პერსონალი ბევრი ტატუთითაც მინახავს და პირსინგითაც.“– წერს სალომე ზანდუკელი, რომელმაც მუშაობის დაწყება „მაკდონალდსში“ სცადა.
დავინტერესდი, ზოგადად თუ რა კრიტერიუმებს უნდა აკმაყოფილებდეს ადამიანი, იმისათვის, რომ დაიწყოს „მაკდონალდსში“ მუშაობა, არის თუ არა რაიმე აკრძალვები (მაგ.: ტატუ, პირსინგი), ასევე რამდენად დიდი ყურადღება ექცევა ვიზუალსა და უცხო ენების ცოდნას. ამ და სხვა საკითხებზე „თბილისი თაიმსი“ „მაკდონალდსის“ თანამშრომლებსა და მენეჯერს ესაუბრა.
„მაკდონალდსის“ მენეჯერი (სახელი და გვარის იდენტიფიცირებისგან თავი შეიკავა): „თანამშრომლებს შესწავლილი აქვთ და შესაბამისად მუშაობენ რესტორნის არა მხოლოდ ერთ კონკრეტულ სადგურზე, მაგალითად: სალაროსთან, არამედ რესტორნის სხვადასხვა უბანზე. თანამშრომელთათვის 8 საათიანი სამუშაო დღის განმავლობაში განკუთვნილია 30 წუთიანი შესვენება. უცხო ენები არ არის აუცილებელი მოთხოვნა, მთავარია იყო შრომისმოყვარე. არ დაგეზაროს საქმის კეთება. უნდა იმუშაო ყველა ფაზაში. უნდა იყო ძლიერი, რომ გაუძლო იმ ქაოსს, რაც მთელი დღის განმავლოვბაშია „მაკდონალდში„. თანამშრომლის მხრიდან, აუცილებელია ურთიერთპატივისცემა სტუმრების, კოლეგებისა და მენეჯერების მიმარ, ასევე გუნდური მუშაობის პრინციპის დაცვა. რაც შეეხება აქსესუარებს, გუნდის წევრის ზოგად მოვალეობებში აღწერილია, რომ შეზღუდულია აქსესუარისა თუ სამკაულის ტარება მუშაობის პერიოდში (საათი, სამაჯური, ბეჭედი, საყურე, თმის სარჭი). თმის ვარცხნილობა სადა და კოსმეტიკა ზომიერი. ფრჩხილები მოწესრიგებული, მოკლე და ლაქის გარეშე,“ – განმარტავს მენეჯერი.
დავინტერესდი, ჰქონდათ თუ არა ანალოგიური პრობლემები თანამშრომლებს. მიუხედავად იმისა, რომ თანამშრომლების ჩაწერა, ისევე როგორც მენეჯერის ამიკრძალეს და მხოლოდ ზეპირი ინფორმაციის გაცემით შეოიფარგლენ, მაინც შევეცადე მცირე ინფორმაცია მიმეღო.
ერთ-ერთი თანამშრომელი მარიამი (გვარის დასახელებისგან თავი შეიკავა) უკვე მესამე წელია „მაკდონალდსის“ სწრაფი კვების ობიექტში მუშაობს. მიუხედავად მძიმე სამუშაო დღეებისა, ის კმაყოფილია საკუთარი სამსახურით, არც ანაზღაურებას უჩივის. ერთდერთ პრობლემად თანამშრომლებთან ურთიერთობას ასახელებს.
„ხშირად არის შემთხვევა, როდესაც რომელიმეს საქმის კეთება ეზარება, ეს კი მთლიან ჯგუფს გვაზიანებს. ერთმაც, რომ შეწყვიტოს საკუთარი საქმის გაკეთება ყველაფერი აირევა და ვერ შევძლებთ კლიენტებისათვის სრულყოფილი მომსახურეობის გაწევას,“ – აცხადებს „მაკდონალდსის“ თანამშრომელი.
საკითხის აქტუალურობიდან გამომდინარე დავუკავშირდი, ასევე სწრაფი კვების ობიექტების ქსელს – „ვენდის“. როგორც აღმოჩნდა, შეზღუდვები, პირსინგზე, ტატუსა და სხვადასხვა აქსესუარზე „ვენდისსაც“ აქვს.
„ვენდისის“ მენეჯერი ირაკლი გველესიანი: „ტატუ არ უნდა ჩანდეს, პირსინგისა და საყურის მოხსნა მუშაობის დროს სავალდებულოა, რადგან ასეთ დროს შეიძლება საკვების ჯვარედინი დაბინძურება მოხდეს. შრომისუნარიანი, კომუნიკაბელური, სწრაფი, დაუზარელლი, პუნქტუალური – ეს ის თვისებებია, რაც ვენდისის თანამშრომელს აუცილებლად უნდა გააჩნდეს. ასევე დიდ ყურადღებას ვაქცევთ უცხო ენების ცოდნას. თანამშრომლები ძალიან დიდ დროს ატარებენ „ვენდისში“ და დაუზარელად შრომობენ. ჩვენ კი მაქსიმალურად ვცდილობთ წავახალისოთ და დავუფასოთ შრომა. თვეში ერთხელ ვასახელებთ თვის თანამშრომელს, რომელსაც ფულად პრემიას გადავცემთ. მნიშვნელოვანია ღიმილიანი სახე, რათა მომხმარებელმა მაქსიმალურად კმაყოფილად და კომფორტულად იგრძნოს თავი,“– აცხადებს „ვენდისის“ მენეჯერი.
მიმაჩნია, რომ თითოეული კადრი კარგად უნდა იყოს შერჩეული, მათ უნდა შეეძლოთ კორექტულად, ზრდილობიანად აუხსნან მსურველს ის მიზეზები რის გამოც თანამშრომლობა ვერ მოხერხდება. თანამშრომლებს თავისუფლად უნდა შეეძლოთ საუბარი სამსახურზე. ძალიან დიდი პრობლემაა, როდესაც ადამიანი ჟურნალიტთან კომენტარის გაკეთებისგან თავს მხოლოდ იმის გამო იკავებს, რომ სამსახური არ დაკარგოს. საუბრობენ გარემოზე, მის დადებითსა თუ უარყოფით მხარეებზე, თუმცა სურთ, რომ მაინც ინკოგნიტოდ დარჩნენ, რათა მომდევნო დღეს ახალი სამსახურის ძებნა არ დასჭირდეთ.
მარიამ ფანჩულიძე
