„არავინ არ დაობს, რომ ნარკოტიკი არის საფრთხილო და ცუდი. მარიხუანადან დაწყებული თეორიულ დონეზე მაინც ვერავინ იტყვის, რომ ეს არის კარგი. ვიცი რამდენიმე ადამიანი, რომელიც მარიხუანით ძალიან სერიოზულად დაზარალდა. პერიოდულად ამტკიცებდნენ, რომ ეს არაფერია, თუმცა დღეს ფსიქოტროპულ წამლებს იღებენ,” – ამის შესახებ ასისტენტ-პროფესორმა გიორგი მიქანაძემ „რუსთავი 2“-ზე, გადაცემა „არჩევანის“ ეთერში ისაუბრა.
„ამ მოძრაობაში აქცენტები არის გადასახედი. ერთმანეთში შეუთავსებელი აქცენტებია. ძირითად მოთხოვნებში არ არის გათვალისწინებული რეაბილიტაციის პროგრამები და მექანიზმები. როდესაც მასალებს ვიკვლევდი, წავაწყდი ძალიან ცუდ პროპაგანდის ელემენტებს. ერთ-ერთ მასალაში წერია, რომ დემოკრატიულ საზოგადოებაში რას უზამ შენს სხეულს, შენი გადასაწყვეტი უნდა იყოს. ეს არის ძალიან ცუდი მესიჯი, როდესაც საქმე ნარკოპოლიტიკას ეხება.
დეკრიმინალიზაცია აუცილებელია და უნდა მოხდეს, მაგრამ ეს არ უნდა იყოს მყისიერი, გაუცნობიერებელი და გაუაზრებელი. ამას სჭირდება სერიოზული, თანმიმდევრული პოლიტიკა. ჩვენ განვითარებადი ქვეყანა ვართ, სერიოზული უმუშევრობა გვაქვს, ამიტომ წინამოსამზადებელი პერიოდი უნდა გავიაროთ, არ შეიძლება ემოციურ ფონზე გადაწყვეტილებების მიღება. ამ სისწრაფეში შესაძლოა ბევრი ახალგაზრდა დაზიანდეს, რომლებსაც ცხოვრებაში სულ სხვა არჩევანის გაკეთება სურდათ.
ეს აქციები თავისთავად არის პროპაგანდის შემცველი, სახელმწიფომ ამ ადამაინების ინიციატივა საკუთარ ხელში უნდა აიღოს და სწორად წარმართოს პოლიტიკა. ცუდია თუ პოლიტიკა სწრაფად იქნება გატარებული, და არ იქნება გათვალისწინებული ადამიანების დაცვის მექანიზმები, ეს არის განათლების დონე და რეაბილიტაციის საკითხი“.
მანანა ღოღობერიძე