„თბილისის მერიაში არის შემოსული წერილი ტარიფის ცვლილებასთან დაკავშირებით. კერძო კომპანიას აქვს უფლება, რომ ამის შესახებ გარკვეული პერიოდით ადრე გვაცნობოს. კომპანიის სურვილია, რომ მგზავრობის ღირებულება ე.წ. “მარშუტკებზე” დაახლოებით ერთ ლარამდე გაიზარდოს. ჩვენ არ გვაქვს სამართლებრივი ბერკეტები, რომ ტარიფზე ზემოქმედება მოვახდინოთ“. თბილისის მერიის მიმდინარე პროექტებზე და მომავალ წელს დაგეგმილ ცვლილებებზე თბილისის მერის მოადგილემ ირაკლი ლექვინაძემ ტელეკომპანია „GDS“-ზე, გადაცემა „2030“-ის ეთერში ისაუბრა.
„გვინდა კომპანიას მოვუწოდოთ, რომ ტარიფის ცვლილება არ განახორციელოს. ჩვენ ტარიფის მატებას მხოლოდ საბაგირო ხაზზე განვიხილავთ. ტარიფის გაზრდა არ განიხილება მეტროს და ავტობუსების მიმართულებით, მიუხედავად იმისა, რომ შეიძლება საწვავზე ფასებმა მოიმატოს და მიუხედავად იმისა, რომ ახალი ავტობუსები შემოგვყავს.
ჩვენი 2017 წლის ბიუჯეტი 801 მილიონ ლარს შეადგენს. თბილისის 2017 წლის ბიუჯეტის ყველაზე მოცულობითი ნაწილი არის ტრანსპორტი და სატრანსპორტო ინფრასტრუქტურის მშენებლობა-აღდგენა. პრიორიტეტია ჯანდაცვა და სოციალური უზრუნველყოფა, რომელიც დაახლოებით 185 მილიონი ლარს შეადგენს. მოცულობით შემდეგი მიმართულებაა მშენებლობა, ავარიული შენობების გამაგრება, მოიცავს დაახლოებით 140 მილიონი ლარს. ეკოლოგიურ მდგომარეობას დაეთმობა 71 მილიონი, განათლებას კი 110 მილიონი ლარი.
ყველაზე მთავარი არის საზოგადოებრივი ტრანსპორტის განვითარება. საბიუჯეტო სახსრები ასევე მიმართული იქნება მეტროს მოძრავი ინფრასტრუქტურის შეცვლასა და განახლებაზე. მეტრო უკვე 50 წლისაა და რიგი მიმართულებებისთვის საჭიროა მოდერნიზაცია. ეს გულისხმობს ვაგონების განახლებას და არა ახლის შესყიდვას.
დაგეგმილი გვაქვს სააკაძის მოედანზე გახსნილი კვანძის გაგრძელება. ამ კვანძმა ქაოტური მოძრაობა გახადა დაბალანსებული. იქ ხშირად ხდებოდა მოძრაობის გაჭედვა, დღეს შეიძლება პიკის საათში სიმჭიდროვე იყოს, მაგრამ მთლიანობაში სააკაძის მოედანზე ავტომობილების ნაკადები მინიმუმ 3-5 წუთის განმავლობაში არ დგას, თუ რამე სხვა შეფერხება არ არსებობს.
საცობების განმუხტვის მიმართულებით მნიშვნელოვანია ასევე საზოგადოებრივი ტრანსპორტის განვითარება. კიდევ 10 ახალი ავტომობილი მივიღეთ. პირველი იანვრიდან 51-ე მარშრუტი იქნება ახალი. იანვრის შუა რიცხვებიდან დაახლოებით 40 ახალ ერთეულს ველოდებით, ეს იქნება 37 ნომერი მარშრუტი, რომელიც აეროპორტის მიმართულებით მოძრაობს. მარტში დავასრულებთ 143 ერთეული ავტობუსის მიღებას და ამის შემდეგ ახალ ეტაპს ვიწყებთ, ეს გულისხმობს მოკლე ავტობუსების მიმართულებას.
მნიშვნელოვანია პარკირების პრობლემა. დაახლეობით 400 ათას ავტომობილზე მოდის 40 ათასი საპარკინგე ადგილი. ამიტომ ხშირად ავტომობილები იკავებენ ფეხით მოსიარულეთა სივრცეებს. მიწისქვეშა და მიწისზედა საპარგინგე სივრცეების მოწყობას ვგეგმავთ, დაახლოებით 10 ასეთი ლოკაცია გაიხსნება, ეს იქნება ფასიანი ავტოსადგომი,“-განაცხადა ირაკლი ლექვინაძემ.
მანანა ღოღობერიძე
