„ „ნაციონალური მოძრაობის“ მმართველ ჯგუფში იყო ბიუროკრატიის და დაჭაობების ნიშნები. ეს დაკავშირებული იყო პოლიტიკურ რეპრესიებთან და იმასთან რომ საქართველოში ვერ ჩამოვდივარ. რა თქმა უნდა ეს გაყოფა დადებითი მოვლენაა“. „ერთიან ნაციონალურ მოძრაობაში“ მიმდინარე პროცესებზე და გაყოფის მიზეზებზე პარტიის თავმჯდომარემ მიხეილ სააკაშვილმა „რუსთავი 2“–ზე, გადაცემა „არჩევანის“ ეთერში ისაუბრა.
„ეს პროცესი პირველად არ მომხდარა. „ნაციონალური მოძრაობის“ ისტორიაში რამდენჯერმე რაღაც ადამიანების ჯგუფები ყოველთვის მიდიოდნენ. „ნაციონალური მოძრაობიდან“ წინა გასვლა დაკავშირებული იყო ფინანსებთან. პარტია არის ცოცხალი ორგანიზმი, წინსვლის პროცესში ხდება განვითარება, რაღაც უჯრედები კვდებიან და ახლები იბადებიან.
ხალხი არ აძლევდა ხმას პერსონებს, ხალხი აძლევდა ხმას იდეას. პარტია არ არის ბიუროკრატიული ან ფინანსური ორგანიზაცია, ეს არის იდეის გარშემო გაერთიანებული ხალხის ჯგუფი.ამ იდეაში მათ ჭირდებათ ჩემი დახმარება. ხალხმა დაინახა თუ რას მივაღწიეთ იმ საამაყო ცხრა წელში და უნდათ გაგრძელება. ჩვენი თანამებრძოლების ნაწილმა დაკარგა იმ იდეის რწმენა, რასაც ვემსახურებოდით, შესაძლოა არც არასოდეს სჯეროდათ ამის. მათ არ დაუშვეს ყრილობის ჩატარება, რადგან ამ შემთხვევაში სხვა სახის კონფიგურაცია შედგებოდა. ამიტომ ასეთი ხალხი ჯობს პარტიაში არ იყოს. დარჩა ის ხალხი, რომლებსაც სჯერათ იდეის, გამარჯვების. ბევრი მათგანი დაიღალა. გამოდის, რომ ვისაც გვჯერა ისინი უნდა გავატაროთ.
მე მეგობრობას არასოდეს ვურევდი სახელმწიფო საქმიანობაში. არ მიმაჩნდა, რომ პიროვნული ურთიერთობები უნდა დავაყენოთ სახელმწიფოზე და იდეაზე მაღლა.დინებას მიყვებიან მკვდარი თევზები, ჩვენ უნდა ვიყოთ მზად დინების წინააღმდეგ ცურვისთვის, თუ საკუთარ ენერგიაში ვართ დარწმუნებულები,“–განაცხადა მიხეილ სააკაშვილმა.
მანანა ღოღობერიძე
