საქართველოში ალტერნატიული, განახლებადი ელექტროენეგიის წყაროების მუშაობის შედეგზე და მომავალში დაგეგმილ პროექტებზე ქართლის ქარის ელექტროსადგურის დირექტორმა თორნიკე ყაზარაშვილმა ტელეკომპანია „მაესტროზე“, გადაცემა „ბიზნესკონტაქტის“ ეთერში ისაუბრა.
„ქარის სადგური ნოემბრის თვეში ტესტირების რეჟიმზე გადავიდა და ამ პერიოდიდან ელექტროსისტემას ვაწვდით გამომუშავებულ ელექტროენერგიას. დღეის მდგომარეობით 12 მილიონი კილოვატსაათი გვაქვს მიწოდებული. ამ თვეში გეგმას გადავაჭარბებთ. ამ ეტაპზე ადგილზე არის პოტენციალი, რომ დამატებითი სადგურებიც განთავსდეს.
დიდია დაინტერესება უცხოური ინვესტორების მხრიდან, მათ შორის არის ჩინური კომპანიები. 3–4 წლის წინ არსებობდა მხოლოდ იდეა, რომ საქართველოს აქვს პოტენციალი განვითარდეს განახლებადი ენერგიების კუთხით. ჩვენ ვაჩვენეთ რეალური სურათი, იდეა ხელშესახებია.
ენერგეტიკის განვითარების ფონდთან უკვე გაფორმებულია მემორანდუმი და დაწყებულია მუშაობა მზის ელექტროსადგურის კიდევ ერთ პროექტზე, რომელიც კახეთის რეგიონში იქნება. სადგურის მშენებლობას წლის ბოლოსთვის დავიწყებთ. ქარის ელექტროსადგურების მშენებლობისთვის პოტენციალს ვხედავთ ასევე შიდა ქართლში, ზეტაფონსა და საჩხერეში“–განაცხადა თორნიკე ყაზარაშვილმა.
მანანა ღოღობერიძე
