„მუშაობას ვაგრძელებ იმიტომ, რომ მინდა ვიბრძოლო ჩემი უფლებებისთვის. მოვითხოვ,რომ შეიცვალოს სამუშაო პირობები. ხელმძღვანელობისგან არ გვაქვს დაფასება, გეგმების შესრულება თითქმის შეუძლებელია, თუმცა თუ მაინც შევასრულეთ, სათანადოდ არ არის დაფასებული“. ამის შესახებ „ბიბლუსი გალერეას“ თანამშრომელმა, გიორგი კაპანაძემ „ტვ პირველზე“, გადაცემა „დიანა ტრაპაიძის დღის ამბების“ეთერში ისაუბრა.
„ვიკვებებით საწყობში, როცა უნდა გვქონდეს სასადილო. უნდა გვქონდეს ერთ საათიანი შესვენება, მაგრამ ერთმანეთის ხარჯზე ვახერხებთ 15 წუთით დასვენებას. დასაქმებულების უმრავლესობა ვართ სტუდენტები. როცა 8 საათი ვმუშაობთ და ღამის 11 საათზე ვამთავრებთ სამსახურს, რჩება მცირე დრო, რომ ვიმეცადინოთ. კომუნიკაცია ხელმძღვანელობასთან გვქონდა, მაგრამ ამას არ აქვს მუდმივი ხასიათი. ხელმძღვანელობას შეეძლო მოსულიყო ჩვენთან და ესაუბრა, თუმცა ეს დაგვიანებით მოხდა. ამიტომ იძულებულები გავხდით, გაგვევრცელებინა ვიდეო“.
შეუსაბამო შრომის პირობებზე კომპანია „ბიბლუსის“ ყოფილმა თანამშრომელმა, აკაკი ზოიძემაც ისაუბრა.
„სამსახურიდან სრულიად უსაფუძვლოდ გამათავისუფლეს. ერთადერთი არგუმენტი, იყო უხეში შელაპარაკება ოფისის თანამშრომლებთან. დეკემბრის თვეში გაცილებით მეტი ვიმუშავეთ. განსხვავებული ფორმატით ვმუშაობდით, საახალწლო კოლექციის დიდი რაოდენობა იყო. 8 საათიან სამუშაო დღეს ვუმატებდით ღამეებს. ანაზღაურებას 40 %–ით მეტს ველოდით, ვიდრე დაგვერიცხა. გამოვთქვით პრეტენზიები რამაც რეაქცია გამოიწვია. თუმცა, მხოლოდ ეს არ მგონია ჩემი დათხოვნის მიზეზი. ჩემმა ყოფილმა თანამშრომლებმა გამოგვიცხადეს სოლიდარობა, ისინი ჩვენს აღდგენას ითხოვენ“.
მანანა ღოღობერიძე
