საზოგადოებრივ ტრანსპორტში ხშირად რომ უხერხულ სიტუაციებს ვაწყდებით, ეს ახალი ამბავი ნამდვილად აღარ არის. ამასთან დაკავშირბით, ჟურნალისტმა, ნინო მანიაშვილმა, სოციალურ ქსელში საკუთარ გვერდზე პოსტი გამოაქვეყნა. ტექსტს უცვლელად გთავაზობთ:
,,ჩემი მეგობარი ყვითელ ავტობუსში ადის. მართალია, პალტოში დიდად არ ეტყობა, მაგრამ უკვე 6 თვის ორსულია. ფეხზე დგომა უჭირს, ამიტომ ასვლისთანავე იქვე, კართან, თავისუფალ სკამზე ჯდება. შემდეგ გაჩერებაზე ავტობუსში შუახნის ქალბატონი ამოდის. თავისუფალი ადგილი აღარ არის. უკმაყოფილი სახეს იღებს და ჩემს მეგობარს რუსული აქცენტით მიმართავს: ეი, შენ! უზრდელო! შე უზრდელო! თავხედო! სად გაიზარდე! ახლავე აბრძანდი და ადგილი დამითმე, რომ გამოჭიმულხარ! ახლავე! ამ უზრდელს უყურეთ რაა! შეხედეთ ერთი…შეხედეთ!” – გაჰკივის ბოლო ხმაზე.
ჩემს მეგობარს ჯერ ერთი კურცხალი ჩამოუგორდა, შემდეგ – მეორე.. და… მოკლედ, ასეთ მდგომარეობაში ხომ განსაკუთრებულად ემოციურები არიან და მასაც თვალები ცრემლებით ამოევსო. უმალ წამოდგა. ადგილი დაუთმო და მოწიწებით მიმართა: ”მაპატით ქალბატონო, ფეხმძიმედ ვარ. ფეხზე დგომა ძალიან მიჭირს, მალე ვიღლები და მაშინვე ამიტომ ვერ ავდექი!” ქალბატონი გამარჯვებულის იერით დაებერტყა (უკაცრავად ამ გამოთქმაზე, მაგრამ…) სკამზე, კარგად შესწორდა, გემრიელად მოკალათდა და თავი ”სამშვიდობოს” რომ დაიგულა, წინანდებური უკმეხობითა და უხეშობით მიმართა: ”მე რა ვიცოდი, რომ ორსულად იყავი. მე საიდან უნდა მცოდნოდა ნეტა…” – შეუბღვირა, საზურგეს მიეყრდნო და მეტი კომფორტისთვის იდაყვი სახელურზე ჩამოდო.
ატირებული ორსული მომდევნო გაჩერებაზევე ჩამოვიდა, მიუხედავად იმისა, რომ დანიშულების ადგილამდე ჯერ კიდევ შორი იყო…
ციკლიდან #რაუზრდელითაობამოდის არა?”
ნინო ზარიძე
