„2012 წელთან შედარებით 2016 წელს ორჯერ არის ავტომობილების რაოდენობა გაზრდილი, სულ არის 450 ათასი მსუბუქი ავტომობილი და პლიუს 100 ათასი ტრანზიტული ავტომობილი, რომელიც ყოველდღიურად მოძრაობს“. ამის შესახებ თბილისის მერის მოადგილემ, ირაკლი ლექვინაძემ „საზოგადოებრივ მაუწყებელზე“, გადაცემა „რეალური სივრცის“ ეთერში ისაუბრა.
„თბილისი არის ე.წ მერების შეთანხმების, „სიიაპი“-ს მონაწილე, რომელიც ევროპული ქალაქების გაერთაინებას გულისხმობს და გვაქვს კონკრეტული სამოქმედო გეგმა. ერთ-ერთი მთავარი დამაბინძურებელი არის ტრანსპორტი, ავტომობილის სიძველიდან და საწვავის ხარისხიდან გამომდინარე, დაბინძურების დონე მაღალია. „მერების შეთანხმების“ ერთ-ერთი ნაწილია სატრანსპორტო სფეროში ცვლილებები და პირველ რიგში ეს მუნიციპალურ ტრანსპორტს ეხება. დღეს მუნიციპალური ტრანსპორტი არის 550 ავტობუსი, მათგან დაახლოებით 40 ავტობუსი არის ახალი. ეს ავტობუსები ბუნებრივ აირზე მუშაობენ და ემისიის შედარება არც კი შეიძლება ე.წ ყვითელ ავტობუსებთან.
მაისის ბოლოდან 143 ასეთი ავტობუსი ივლის თბილისში. ე.წ მერების შეთანხმება გულისხმობს 2020 წლამდე, მოსახლეობის ზრდის შესაბამისად, ემისიების 20 %-ით შემცირებას. დიდი ინვესტიციები გვჭირდება ენერგოეფექტური შენობებისთვის. მნიშვნელოვანია ასევე ნარჩენების მართვა, გვაქვს ნაგავგადამამუშავებელი ქარხნის პროექტი. ნაგავსაყრელები უნდა გახდეს დახურული“ , – განაცხადა ირაკლი ლექვინაძემ.
მანანა ღოღობერიძე