ადამიანების უმრავლესობა თავიანთ სხეულს დიდ ყურადღებას უთმობს. ფორმაში ყოფნა ყოველი პიროვნებისთვის სასურველი მდგომარეობაა. ამ მხრივ, გამორჩეულნი ქალბატონები არიან. მდედრობითი სქესის წარმომადგენლებისთვის ვიზუალი ერთერთი უპირველესია. სხეულის ლამაზი ფორმების შესანარჩუნებლად ძალიან დიდი შრომაა საჭირო, მით უფრო, თუ ორგანიზმს სიმსუქნისკენ აქვს მიდრეკილება. The Tbilisi Times დიეტოლოგ, ლაშა უჩავას დაუკავშირდა. როგორ უნდა ვებრძოლოთ ჭარბ წონას, რეკომენდირებულია თუ არა დიეტები, დღეში რა რაოდენობის წყლის მიღებაა აუცილებელი და ზოგადად, რა არის საჭირო ფორმაში ყოფნისათვის, ინტერვიუდან გაიგებთ.
ქართველები თუ გამოვირჩევით ჭარბი წონით, და ზოგადად, კავკასიელი ადამიანი სიმსუქნისადმი რამდენად მიდრეკილია , ჭარბწონიანობა უმეტესად სხეულის რომელ ნაწილებში გვაქვს?
– სიმსუქნე საკმაოდ გავრცელებული დაავადებაა მსოფლიოში და ის შეიძლება 21-ე საუკუნის ეპიდემიად ჩაითვალოს. აქედან გამომდინარე, არც საქართველო გახლავთ გამონაკლისი. 1992 წლის მონაცემებით, საქართველო სიმსუქნით დაავადებულ ქვეყნებს შორის ევროპაში მე-14 ადგილზე იყო, ხოლო 2002 წლისთვის უკვე ათეულში მოვხვდით და მერვე ადგილზე გადავინაცვლეთ. რაც შეეხება კავკასიის რეგიონს, აქ შედარებით უკეთ გვაქვს საქმე, კავკასიელ ხალხში სიმსუქნის განვითარების კუთხით ბოლო ადგილზე ვართ.
კვების დროს ყველაზე დიდი ყურადღება რას უნდა მივაქციოთ?
-კვების დროს მნიშვნელოვანია ყურადღება მივანიჭოთ ულუფას, რამდენად ჯანსაღია პროდუქტი და შეიცავს თუ არა იმ აუცილებელ კომპონენტებს, რაც აუცილებელა ჩვენი ნორმალური ცხოველმყოფელობისათვის, ესენია: ცილები, ცხიმები, ნახშირწყლები, ვიტამინები, მიკრო და მაკროელემენტები, ასევე რაც მნიშვნელოვანია, კვება უნდა იყოს ჯერადი დღის განმავლობაში და ხილი არ უნდა გამოვიყენოთ, როგორც დესერტი, მას უნდა მივაკუთვნოთ კვების ცალკე დრო.
დღეში რამდენი ლიტრი წყლის მიღებაა აუცილებელი და სასმელი წყლის რაოდენობა ადამიანის წონაზე რამდენად მოქმედებს?
– წყლის რაოდენობა ინდივიდუალურია, ასევე, გასათვალისწინებელია აქვს თუ არა რაიმე დაავადება ადამიანს, რა დროსაც წყლის რაოდენობა შეზღუდული უნდა იყოს. მსოფლიო ორგანიზაციის მიერ მოწოდებულია შემდეგი ფორმულა: ჩვენი წონა უნდა გავამრავლოთ 0,033-ზე და მიღებული ციფრის ოდენობა არის ჩვენი დღიური ნორმა წყლის რაოდენობისა.
როგორია თქვენი დამოკიდებულება დიეტების მიმართ? მაგ: ამჟამად საზოგადოებაში ყველაზე გავრცელებული, დუკანის დიეტა რომ შეგვიფასოთ. რამდენად ურჩევდით ადამიანებს ამ კონკრეტული დიეტის დაცვას?
– დიეტა ეს არის სწორი, ბალანსირებული, რაციონალური, ჯანსაღი კვება, ამიტომ თუ ასე განვსაზღვრავთ სიტყვა დიეტას, რა თქმა უნდა, ეს ჩემთვის მისაღებია, მაგრამ თუ ჩვენ ვგულუსხმობთ შიმშილს, მე ამის წინააღმდეგი ვარ, მითუმეტეს, მოზარდ ადამიანებში. რაც შეეხება დუკანის დიეტას, მისი ძირითადი პრინციპები ჩემთვის მისაღებია და ამაში ნოვაცია არაფერია. უბრალოდ, ჩემი მოსაზრებით, როდესაც გადავდივართ დაბალკალორიულ კვებაზე ან ვმკურნალობთ სიმსუქნეს, აუცილებელა გარკვეული დიაგნოსტიკა, რადგან სიმსუქნე ორგანიზმში გარკვეულ პათოლოგიურ ცვლილებებს იწვევს, რა დროსაც არასწორი მკურნალობით (დიეტით) შესაძლებელია მდგომარეობა კიდევ უფრო გავართულოთ.
პურის აკრძალვის შესახებ რას გვეტყვით? ავნებს თუ არა ორგანიზმს უპურობა?
– დიეტის დროს პურის აკრძალვა სულაც არ არის აუცილებელი, უბრალოდ, რიგ შემთხვევებში, ეს ფსიქოლოგიური დამოკიდებულებაა პაციენტთან, რაც მკურნალობის დროს მნიშვნელოვანია და პურის ამოგდებას თვითონვე ითხოვენ. თუმცა, მისი საკვების რაციონიდან ამოღებაც ზიანის მომტანი არ არის, რადგანაც ბურღულეულს საკვები რაციონიდან სრულიად მაინც არ ვიღებთ.
ამბობენ, რომ დიეტა ადამიანის ნერვიულ სისტემაზეც მოქმედებს, რას იტყვით ამის შესახებ?
– დიახ, რა თქმა უნდა, დიეტა ჩვენს ემოციურ მდგომარეობაზე და შესაბამისად ნერვულ სისტემაზე მოქმედებს, თუმცა ინდივიდუალურად. როდესაც ჩვენ ჯანსაღ კვებაზე ვართ და წონის კლება ხდება, ადამიანში ეს დადებით ემოციებს იწვევს და ნერვულ სისტემაზეც შესაბამისად დადებითად მოქმედებს, ხოლო თუ ჩვენ ვშიმშილობთ, ეს ნერვულ სისტემაზეც უარყოფითად აისახება.
რომელია 3 ყველაზე მაღალკალორიული პროდუქტი?
– ასე კონკრეტულად მაღალკალორიულ პროდუქტს ვერ გამოვყოფთ, თუმცა შეიძლება ვთქვათ, რომ პროდუქტები რომლებიც შეიცავენ დიდი რაოდენობით ცხიმებს ეს პროდუქტები შესაბამისად მაღალკალორიულები არიან, რადგან 1 გრ ცილა= 4 კკალ, 1 გრ ნახშირწყალი =4 კკალ, ხოლო 1 გრ ცხიმი =9 კკალ.
რას ურჩევდით ადამიანებს, რომელთაც ჭარბი წონა აწუხებთ ან უბრალოდ სურთ, რომ იდეალურ ფორმაში იყვნენ?
– აუცილებელია კვება 4-5-ჯერ დღეში. სასურველია, ყველაფერი უშაქროდ და უმარილოდ იყოს. დღის განმავლობაში მინიმუმ 1,5 ლიტრი სუფთა წყლის მიღებაა საჭირო და ასევე მნიშვნელოვანია ფიზიკური აქტივობა. თუ ჩვენ გვინდა წონის შენარჩუნება, მიღებული და გაცემული ენერგია თანხვედრი უნდა იყოს, მაგრამ თუ ჩვენ გვინდა წონის კლება, ამ შემთხვევაში მიღებული ენერგია ანუ საკვები 500-800 კკალ-ით ნაკლები უნდა იყოს, ვიდრე გახარჯული (ფიზიკური აქტივობით) ენერგია.
ნინო ზარიძე
