„საქართველოს გზა არის საერთაშორისო დღის წესრიგში, მის პარტნიორებთან ორმხრივ ურთიერთობებში ისაუბროს ანტიანექსიურ პოლიტიკაზე, ანტიანექსიურ ნაბიჯებზე. უკვე ვეღარ ვისაუბრებთ მხოლოდ და მხოლოდ ოკუპაციაზე“. უშიშროების საკითხებში საქართველოს პრეზიდენტის თანაშემწემ, ეროვნული უშიშროების საბჭოს მდივანმა, დავით რაქვიაშვილმა სერგეი ლავროვი და გრიგორი კარასინი სოხუმში გატარებული პოლიტიკური ქმედებების გამო გააკრიტიკა. ამის შესახებ მან „რუსთავი 2“-ზე, გადაცემა „კურიერის“ ეთერში ისაუბრა.
„ეს არ არის პოლიტიკური ან დიპლომატიური კუთხით შესაფასებელი, ეს პირველ რიგში არის მორალურად შესაფასებელი. ლავროვი და კარასინი იმ ქუჩებში სეირნობდნენ, საიდანაც ჩვენი ასიათასობით თანამემამულე არის გამოყრილი. ეს არის რუსეთის ტრადიციული ცინიკური პოლიტიკა,რომელსაც ის კავკასიაში აწარმოებს. ეს ბმაშია იმ პოლიტიკასთან, რაც მიზნად ისახავს,რომ შეგვაჩვიონ ჩვენც და ჩვენი პარტნიორებიც ახალ რეალობას და პოლიტიკური ძალის დემონსტრირება მოახდინონ შავი ზღვის რეგიონში.
განცხადებები უნდა კეთდებოდეს, არავითარ შემთხვევაში არ უნდა ჩავთვალოთ, რომ ეს განცხადება რუტინულია და არაფერს არ ნიშნავს. პირიქით, ჩვენ გაცილებით უფრო ხმამაღლა უნდა ვსაუბრობდეთ არა მარტო ხელისუფლებაზე, რა თქმა უნდა, საუბარია ჩვენს პოლიტიკურ პარტნიორებზე. არ შეიძლება, ამ საკითხებს შევეგუოთ.
ამის პარალელურად საქართველომ ყველა ძალა უნდა იღონოს იმისთვის,რომ რუსეთმა პოლიტიკური ფასი გადაიხადოს. ჩვენ უნდა ვსაუბრობდეთ უკვე იმ ნაბიჯებზე, რომელიც საერთაშორისო თანამეგობრობამ ჩვენთან ერთად გაცილებით უფრო ეფექტურად უნდა გადადგას იმისთვის, რომე შეაჩეროს ეს ნაბიჯები“ , – განაცხადა დავით რაქვიაშვილმა.
მანანა ღოღობერიძე
