რეგიონული განვითარებისა და ინფრასტრუქტურის სამინისტროს ორგანიზებით თბილისში საერთაშორისო კონფერენცია “საავტომობილო გზები და კომუნიკაციები” გაიხსნა.
კონფერენციის გახსნამდე რეგიონული განვითარებისა და ინფრასტრუქტურის მინისტრმა დავით ნარმანიამ, ეკონომიკის მინისტრმა გიორგი კვირიკაშვილმა, საკრებულოს თავმჯდომარე ირაკლი შიხიაშვილმა და მიწვეულმა სტუმრებმა ტექნიკური უნივერსიტეტის ადმინისტრაციული შენობის ეზოში ტექნიკის გამოფენა დაათვალიერეს.
დავით ნარმანიას განცხადებით, კონფერენციის მიზანია, ხარისხიანი ინფრასტრუქტურის მიღწევისათვის, ამ სფეროებში გლობალურ დონეზე აღიარებული ინოვაციების შესახებ ინფორმაციის გაზიარება, გამოცდილების გაცვლა, კერძო და საჯარო სექტორებს შორის კონტაქტების დამყარება და სამეცნიერო-კვლევითი საქმიანობის ხელშეწყობა.
“მნიშვნელოვანი კონფერენციაა, რომელიც ეძღვნება საგზაო ინფრასტრუქტურას და მიწისქვეშა კომუნიკაციებს. ჩვენ გვყავს უცხოელი ექსპერტები მოწვეული, რომლებიც გაგვიზიარებენ გამოცდილებას თუ როგორ უნდა შევქმნათ თანამედროვე ინფრასტრუქტურული პროექტები. აქ საუბარი იქნება როგორც ევროპული სტილის საგზაო სამუშაოებზე, ასევე გზების მოვლა-შენახვასთან დაკავშირებულ საკითხებზე, რასაც თანამედროვე ევროპული სტანდარტები ცნობს. მომდევნო წლიდან ჩვენ თანამედროვე და ევროპული სტანდარტები უნდა გვქონდეს და ამით ჩვენ უარს ვიტყვით საბჭოთა პერიოდის 1985-86 წლების სტანდარტებზე, რომლებიც ჩვენდა სამწუხაროდ, დღემდე გამოიყენება სხვადასხვა სახის საჯარო ინფრასტრუქტურის მშენებლობის დროს”, – განაცხადა მინისტრმა.
კონფერენციის მნიშვნელობაზე ჟურნალისტებთან ეკონომიკის მინისტრმა გიორგი კვირიკაშვილმაც ისაუბრა.
“ეს არის მესამე საერთაშორისო კონფერენცია. ძალიან კარგია, რომ კონფერენცია ტარდება ტექნიკური უნივერსიტეტის ბაზაზე, იქიდან გამომდინარე, რომ, ტექნიკური უნივერსიტეტი, ამ მიმართულებით, კადრების სამჭედლო იყო. ეს კონფერენცია ასევე მნიშვნელოვანია იმით, რომ ყველაზე თანამედროვე ტექნოლოგიების გაზიარება ხდება კერძო და საჯარო სექტორებს შორის და მდიდარი ინფორმაციის გაცვლა ხდება”, – განაცხადა კვირიკაშვილმა.
ამასთან, თბილისის საკრებულოს თავმჯდომარემ ირაკლი შიხიაშვილმა ჟურნალისტებთან საუბარში ქალაქში ინფრასტრუქტურის განვითარების მნიშვნელობას გაუსვა ხაზი.
“რეალურად ძალიან ბევრი რამ კეთდებოდა ამ ქალაქში, მაგრამ იმ მდარე და დაბალი ხარისხით, რომლის შედეგებს ძალიან მძიმედ იმკიდა ქალაქი. მიუხედავად იმისა, რომ ქალაქში ინფრასტრუქტურის განვითარების დიდი ტრადიციები არსებობს, მეცნიერულ და თანამედროვე დონეზე ბევრ რამეში გვაქვს ჩამორჩენა და ჩვენი მიზანია ამ კუთხით მოხდეს სიახლეების ქალაქში დანერგვა, რათა კომფორტული გახდეს ნებისმიერი მოქალაქისთვის ცხოვრება”, – განაცხადა შიხიაშვილმა.
საქართველოს მთავრობის წევრებთან, ექსპერტებთან და პრაქტიკოსებთან ერთად, კონფერენციის მუშაობაში მონაწილეობას მიიღებენ დარმშტადის გამოყენებით მეცნიერები უნივერსიტეტის, ტალინის ტექნოლოგიის უნივერსიტეტის პროფესორები; კომპანიების – USIP, ArcelorMittal, CFF GmbH & KG, Prok. Dipl. HTL-lng, Bomag, IPN GbR, UV Rheinland Schniering GmbH ხელმძღვანელები; ესტონეთის საგზაო ადმინისტრაციის, ფუნშტადის სექციური დაგეგმარებისა და ეკოლოგიის საქალაქო ინჟინერიის განყოფილების, ავსტრიული საკონსულტაციო კომპანიის პირველი პირები.
კონფერენციის ძირითადი თემებია ასფალტ–ბეტონის გზის დაგეგმარება/მშენებლობა და მოვლა–შენახვა; საგზაო მოძრაობის უსაფრთხოება; წყლისა და საკანალიზაციო სისტემების დაგეგმვა/მშენებლობა და რეაბილიტაცია; ხიდების მშენებლობა და მოვლა–შენახვა. კონფერენციის სპონსორები არიან: მსოფლიო ბანკი (WB); აზიის განვითარების ბანკი (ADB); იაპონიის საერთაშორისო თანამშრომლობის სააგენტო (JICA); გერმანიის განვითარების ბანკი (KFW); Sweroad.
სპონსორებისგან გადმორიცხული თანხა მთლიანად გადაირიცხება ლეიკემიის მქონე ბავშვთა დასახმარებლად.
11.09.13
