„ოკუპირებული ტერიტორიების შესახებ“ კანონში შეიძლება ცვლილებები შევიდეს. ამის შესახებ „თბილისი თაიმსს“ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა განუცხადა. კონკრეტულად რა ცვლილებები შეიძლება განხორციელდეს, ჯერჯერობით, უცნობია. თუმცა, მინისტრის თქმით, ყველა ის ზომა იქნება მიღებული, რომელიც შერიგებისა და ჩართულობის პოლიტიკაში ჯდება.
“არ არის გამორიცხული, მომავალში ჩვენ ვიმუშავოთ გარკვეულ ცვლილებებზე, რომელიც მიმართული იქნება ადამიანების ყოფის შემსუბუქებისაკენ, ვინაიდან პრინციპი ამ კანონის გახლავთ, ერთი მხრივ, ოკუპაციის წინააღმდეგ სამართლებრივი ინსტრუმენტის არსებობა და მეორე მხრივ, მის ამოცანას არ წარმოადგენს ადამიანების წინააღმდეგ რაიმე ქმედებების განხორციელება. ამიტომ ყველა ის ზომა იქნება მიღებული, რომელიც ჯდება ჩვენი შერიგების და ჩართულობის პოლიტიკაში, ჩვენს მშვიდობიან პოლიტიკაში, რომელიც მიმართულია კონფლიქტით დაზარალებული მოსახლეობის ყოფის გაუმჯობესებაზე, კონფლიქტით გახლეჩილი საზოგადოების დაახლოებაზე, მეტი სარგებლის მიწოდებაზე აფხაზეთისა და ცხინვალის რეგიონში მცხოვრები ადამიანებისთვის, მათ შორის, ევროპული ინტეგრაციიდან თუ ჩვენს პარტნიორებთან სხვა თანამშრომლობის ფორმატებიდან გამომდინარე სარგებლის მოწოდებაზე – ასეთი ცვლილებები შეიძლება განხორციელდეს და არ გამოვრიცხავ, ამ მიმართულებით გვქონდეს გარკვეული მსჯელობები, სიახლეები და ეს არ ეხება მხოლოდ „ოკუპირებული ტერიტორიების შესახებ“ კანონს“. – ქეთევან ციხელაშვილი.
ნინი მაზიაშვილი
