დიდ ბრიტანეთში ყველაზე ხანგრძლივი სასამართლო პროცესი 58 წლის შემდეგ დასრულდა. თუმცა, ის იმდენ ხანს გაჭიანურდა, რომ და-ძმა, რომელიც სახელმწიფოს მათი სახლის წინ არსებული ბილიკის გამო ედავებოდა, გადაწყვეტილების გამოტანისას ცოცხლები აღარ იყვნენ. ამბავს სტატია Daily Mail-მა მიუძღვნა.
სამართლებრივი ბრძოლა 1959 წელს დაიწყო, როდესაც არჩი და ივი პეპარდებმა მათ ნაკვეთში არსებული ტალახიანი ბილიკი შემთხვევით საზოგადოებრივ საფეხმავლო გზად გააფორმეს. მას შემდეგ მათ სახლის კართან უამრავმა ადამიანმა დაიწყო სიარული. პეპარდებს ეს ამბავი არ მოეწონათ და სასამართლოს მიმართეს.
საქმე უმაღლეს ინსტანციამდე მივიდა და უკვე გარდაცვლილი მოსარჩელეების სასარგებლოდ გადაწყდა. მათი სიმართლის დასადასტურებლად ამოიღეს ძველი, 1799 წლით დათარიღებული რუკები, რომლებზეც ეს ბილიკი კერძო საკუთრებაში იყო მითითებული. ამჟამად ის საზოგადოებრივ კუთვნილებად დიდი ბრიტანეთის არცერთ რუკაზე არ არის მონიშნული.
1994 წელს ამ საქმეს ხელი პეპარდების მეზობელმა, მარლინ მასტერსმა მოკიდა – მას, უბრალოდ, შეეცოდა მოხუცები, რომლებსაც არ ჰქონდათ საკმარისი განათლება და არ შეეძლოთ საკუთარი ინტერესების დაცვა. სამართლიანობისთვის ბრძოლა მან და-ძმის გარდაცვალების შემდეგაც გააგრძელა.
წყარო: imedinews.ge
