„მიხეილ სააკაშვილის მმართველობა საქართველოში ერთი ჩვეულებრივი „კაციჭამია რეჟიმი“ იყო.ასე არ არის,რომ ცუდი ამბები კარგი ამბებით გავქვითოთ. სააკაშვილი პასუხისმგებელია მინიმუმ ერთი წამების დანაშაულში, სანდრო გირგვლიანის საქმეში“ , – ამის შესახებ თავდაცვის ყოფილმა მინისტრმა, თინა ხიდაშელმა „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„საერთოდ არ მჯერა,რომ ის უკრაინაში შევა. ის აღარ არის ქართველი პოლიტიკოსი თავისი მოქმედებებით. როდესაც ქართველი პოლიტიკოსი იყო, ასეთი განსაკუთრებული სიმამაცით არ გამოირჩეოდა. ის პოლიტიკური ავანტიურისტია და შესაძლოა ბევრ რამეზე წავიდეს. ყოველთვის პოლიტიკური ელფერი ექნება საქმეს,როდესაც განსასჯელის სკამზე ზის ყოფილი პრეზიდენტი და ყოფილი გუბერნატორი.ძალიან უნდა მოინდომოს რომელიმე ქვეყნის პროკურატურამ რო დადოს სრულყოფილი საქმე, რომელიც კითხვებს არ გააჩენს.
საქართველოს ხელისუფლებას არც ერთი დღე არ ჰქონია სააკაშვილის დაპატიმრების სურვილი. ის სჭირდებოდათ მთავარ საფრთხობელად საარჩევნო ხაზზე. მისი შიშით გამოკვება მოსახლეობა „ქართულმა ოცნებამ“ და სამარცხვინო საკონსტიტუციო უმრავლესობით ქვეყანა მიჰყავთ კატასტროფამდე.
სააკაშვილი საქართველოში ახალ რევოლუციას ვერ მოაწყობს, ეს ნათელია. მისი ამომრჩეველი არ არის ცოტა, მაგრამ არის კლების მიმართულებით. მისი ადგილი არის „მატროსოვის“ ციხეში, ზუსტად ისე,როგორც ნებისმიერი სხვა კრიმინალის. მისი დაპატიმრებით დასრულდება „ქართული ოცნების“ მაცოცხლებელი წყარო, სააკაშვილის,როგორ საშიშროების, საფრთხის სახით. როგორც ჩანს, სააკაშვილი უფრო ჭკვიანი აღმოჩნდა და იძულებით ჩააყენებს „ქართულ ოცნებას“ ამ მდგომარეობაში“ , – განაცხადა თინა ხიდაშელმა.
