„ბუნებრივია მე ეს გადაწყვეტილება შესაძლოა უფრო ადრეც მიმეღო, მაგრამ მინდოდა მებრძოლა ბოლომდე. როდესაც ამოსუნთქვის საშუალება მიეცა „რუსთავი 2“-ს, მხოლოდ მაშინ წავედი“ , – ამის შესახებ „ნაციონალური მოძრაობის“ თბილისის მერობის კანდიდატმა ზალიკო უდუმაშვილმა „რუსთავი 2“-ზე, „განსხვავებული აქცენტების“ ეთერში ისაუბრა.
„მე არ ვარ პირველი შემთხვევა საქართველოს უახლოეს ისტორიაში,როდესაც ჟურნალისტი მიდის პოლიტიკაში, ამიტომ არ ვფიქრობ,რომ ამან არხის იმიჯი დააზარალა. ადვილად და მარტივად ვსწავლობ ყველაფერს, ზურგს კი გამოცდილი პოლიტიკოსები მიმაგრებენ, ამიტომ გამოცდილების ნაკლებობას წინასაარჩევნოდ არ ვუჩივი.
რაც შეეხება პასუხისმგებლობის აღებას, რატომ არავინ მიხდის მადლობას აშენებული ბათუმის გამო, პოლიციის რეფორმის გამო, მაშინ მადლობებიც უნდა ავიღო. „ნაციონალურ მოძრაობას“ გაცილებით მეტი სიკეთე აქვს გაკეთებული ამ ქვეყნისთვის, ვიდრე შეცდომები. თბილისში იყო შეცდომები, მაგალითად კერძო საკუთრების, თაბუკაშვილის ქუჩის მაგალითზეც. საბოლოოდ მივიღეთ მახინჯი უბნები, სრულიად ქაოტურად მიმდინარეობდა დედაქალაქის მშენებლობა. ალბათ ჩემი ბიოგრაფია, ჟურნალისტიკაში დაგროვებული კაპიტალის სწორად კონვერტირება თუ მოხდება ეს წაადგება პარტიასაც. ზოგადად მიჩვეული ვარ გუნდურ თამაშს და ასე უფრო მეტის მიღწევა შეიძლება.
მთავარი ამოსავალი თბილისში უნდა იყოს ადამიანი. სანამ ერთი მოხუციც ეძებს საკვებს და ერთი ბავშვი მაინც დგას ქუჩაში, თბილისის მერი თავაწეული ვერ ივლის“ , – განაცხადა ზალიკო უდუმაშვილმა.
მანანა ღოღობერიძე
