ცენტრალურმა საარჩევნო კომისიამ თვითმმართველობის არჩევნების პირველადი შედეგები გამოაქვეყნა. ინფორმაცია მხოლოდ თვითმმართველ ქალაქებში (თბილისი, ბათუმი, ქუთაისი, რუსთავი, ფოთი) ჩატარებული არჩევნების წინასწარ შედეგებს მოცავს.
ცესკოს ცნობით, ბრიფინგის მომენტისთვის უწყებას თბილისის უბნების მხოლოდ 22%-ის მონაცემები აქვს დათვლილი, რომლის თანახმად, ქართული ოცნების კანდიდატმა კახა კალაძემ ხმების 51,4% მიიღო, ნაციონალური მოძრაობის ზაალ უდუმაშვილმა – 16,68%, ხოლო დამოუკიდებელმა კანდიდატმა ალექსანდრე ელისაშვილმა – 16,6%, მეოთხე ადგილზეა ევროპული საქართველოს კანდიდატი ელენე ხოშტარია – 7,39%-ით, პატრიოტთა ალიანსის ირმა ინაშვილი – 3,27% და ბურჯანაძის მოძრაობის კანდიდატმა კახა კუკავამ – 1,26%.
ხმების დათვლის შემდეგ, საოლქო საარჩევნო კომისიები არაუგვიანეს 1 ნოემბრისა შეაჯამებენ მუნიციპალიტეტების საკრებულოებისა და მერების არჩევნების შედეგებს (გარდა თბილისის საკრებულოს და მერის არჩევნებისა) და არაუგვიანეს მომდევნო დღისა შემაჯამებელ ოქმებს ცესკოს გადასცემენ.
თბილისის მერისა და საკრებულოს არჩევნების შედეგებს არაუგვიანეს 9 ნოემბრისა თავად ცესკო შეაჯამებს.
