ჯეიმს აპატურაი: “ნატო-ს და მის მოკავშირეებს სურთ დაინახონ, რომ ნაბიჯები გადადგმულია უმცირესობის დასაცავად იმ ქვეყნებში, რომელიც ალიანსის წევრობისკენ მიისწრაფვის”

ჯეიმს აპატურაის განცხადებით, უმცირესობების დაცვა უმნიშვნელოვანესი ღირებულებაა ნატო-ს მოკავშირე ყველა ქვეყნისთვის.

ამის შესახებ საქართველოში ვიზიტად მყოფმა ნატო-ს გენერალური მდივნის სპეციალურმა წარმომადგენელმა კავკასიასა და ცენტრალურ აზიაში, ჯეიმს აპატურაიმ საგარეო საქმეთა სამინისტროში, მაია ფანჯიკიძესთან შეხვედრის შემდეგ გამართულ ერთობლივ პრესკონფერენციაზე განაცხადა.

ამით აპატურაი ანტიდისკრიმინაციულ კანონთან დაკავშირებით დასმულ კითხვას გამოეხმაურა. მისი თქმით, ნატო-ს პოზიცია ამ საკითხთან დაკავშირებით ნატო-ს გენერალურმა მდივანმა უკვე დააფიქსირა და ის გაიმეორებს.

“ამ მიმართულებას ორი პოზიცია აქვს, საქართველო იღებს ისეთ კანონებს, რომელიც პატივს სცემს ქვეყნის საზოგადოების მოთხოვნებს და საქართველოს იურიდიულ ჩარჩოებს. ჩვენ არსად არ გვინდა ჩავერიოთ, ნატო-ს წევრ ქვეყნებშიც კი არ ვერევით ასეთ საკითხებში, მაგრამ აბსოლუტურად რელევანტურია, რომ უმცირესობების დაცვა აუცილებელ უმნიშვნელოვანეს ღირებულებას წარმოადგენს ნატო-ს მოკავშირე ყველა ქვეყნისთვის. უმცირესობა დაცული უნდა იყოს როგორი უმცირესობაც არ უნდა იყოს ეს, ნაკლებად პოპულარული თუ მეტად პოპულარული. ეს ის ღირებულებაა, რომელსაც ძალიან მაღალ დონეზე ვაყენებთ. ზოგადად, ნატო-ს და მის მოკავშირეებს სურთ დაინახონ, რომ ნაბიჯები გადადგმულია უმცირესობის დასაცავად იმ ქვეყნებში, რომელიც ალიანსის წევრობისკენ მიისწრაფვის”, – განაცხადა ჯეიმს აპატურაიმ.

01.05.14