2013 წელს პროექტი „წმინდა ილია მართლის (ჭავჭავაძის) გაზეთ „ივერიის“ სახელობის პროზა-პოეზიის ეროვნული პრემია – „ივერია“ შეიქმნა ქართული პროზა-პოეზიის, ხატწერის, ხატვის და ფოტოხელოვნების პოპულარიზაციის მიზნით, რომელიც მიმდინარეობს მისი უწმინდესობისა და უნეტარესობის ლოცვა-კურთხევით.
„პროექტის უმნიშვნელოვანესი მხარეებია ის, რომ ყოველთვე მონაწილეობს ერთი განსაკუთრებული შესაძლებლობების ადამიანი (ე.წ. შეზღუდული შესაძლებლობების მქონე პირი), ერთი მსჯავრდებული – პატიმარი (ვკითხულობთ მის შემოქმედებას), ერთი სასულეირო პირი და სხვა ათამდე პოეტი. აღნიშნული პროექტი ითვალისწინებს განსაკუთრებული შესაძლებლობების ადამიანების (შშმპ) და მსჯავრდებულთა რესოციალიზაცია-ადაპტაციას, საზოგადოებისთვის მათ გაცნობას და ცხოვრების შემდგომ მოტივაციას, სახელმწიფოს სასარგებლოდ, მათი სოციალური პრობლემების მოგვარებას სხვა ცნობილი პოეტებისა და მწერლების ხელოვანების და საზოგადო მოღვაწეთა დახმარებით.
ასევე, პროექტში ჩართულია ქართველი კლასიკოსების შემოქმედება. ყოველ პოეტურ საღამოს ალამაზებს ხატმწერების, მხატვრების, ფოტოხელოვნების შემოქმედება – გამოფენა. შემოსული მასალები – შემოქმედება, იბეჭდება ჟურნალ „ქართულ ელიტაში“ და „განსაკუთრებულ ჟურნალში“, გაზეთ „ქართულ სიტყვაში“. პრემიის ლაურეატების შემოქმედება გამოიცემა წიგნებად.
პროექტი უკვე მეოთხე წელია (2013 წლიდან), რაც მოგზაურობს საქართველოს სხვადასხვა კუთხეში და მისი უწმინდესობისა და უნეტარესობის სურვილი განახორციელა – აღადგინდა ხალხოსნობა და ახალი თუ ძველი ტაობის პოეტები მჭიდროდ დააკავშირა ერთმანეთს. პროექტის ფარგლებში მოვიარეთ საქართველოს სხვადასხვა მხარე: თუშეთი, ყვარელი, საგარეჯო, გურჯაანი – კაჭრეთი, ხობი, გარდაბანი, მცხეთა, ქუთაისი, საგურამო, თბილისი, გორი, საჩხერე, ქუთაისი და სხვა.
ამ ეტაპზე პროექტმა ასევე შეძლო მისი უწმინდესობის ლოცვა-კურთხევით დაგვერგო ხის ნერგები, ამ შემთხვევაში ბზები, 300-ზე მეტი ძირი, საქართველოს სხვადასხვა კუთხეში. ასევე უფასოდ გავავრცელეთ წმინდა ილია მართლის (ჭავჭავაძის) 3000-ზე მეტი ხატი.
წელს საქართველოში მცხოვრები ეროვნული უმცირესობებიც ჩავრთეთ, რადგან ისინი ჩვენი ქვეყნის სრულუფლებიანი მოქალაქეები არიან და, შესაბამისად, საშუალება უნდა მიეცეთ, რომ საკუთარი თავისა და ნიჭის რეალიზება მოახდინონ პროზა-პოეზიაშიც. გასული წლიდან კი სახალხო მთქმელები და სკოლის ასაკის ახალი თაობა შემოვიყვანეთ პრემია „ივერიაში“, რადგან ესეც უმთავრესია კულტურული ცხოვრებისთვის“ – განაცხადა პროექტისა და პრემიის დამფუძნებელმა, ნუგზარ ჭიაბერაშვილმა.
ამ ტურის მონაწილეები: ზაურ წოწკოლაური, ნოდარ ოდიშელიძე, მარინე ქაციბაია, მარინა მოსესოვა-კირაკოსიანი, ია ეკელი, ნატალია ზღვისპირელი, დიანა ლომიძე, მადონა კალანდია, იოანა-ჟანა ხვიჩია, თამარ ურდულაშვილი, შორენა გაბელაშვილი, ეკა უმეკაშვილი, ეკა მარშანია, ნელი გიუნაშვილი, ალექსანდრე ნავერიანი – მხატვარი.
2017 წლის 28 ოქტომბერი, 17:00 საათი. ნოდარ დუმბაძის საერთაშორისო ფონდი, სულხან ცინცაძის ქ. #63 (ყოფილი საბურთალოს ქუჩა).
