„ნატო აღიქმება,როგორც სამხედრო ორგანიზაცია, თუმცა ის მნიშვნელოვანი დამკვირვებელია ქვეყნის სტაბილურობის, დემოკრატიულობის ხარისხისთვის“ , – ნატო-საქართველოს ურთიერთობის და ატლანტიკურ ალიანსში გაწევრიანების მნიშვნელობაზე პარლამენტის საგარეო ურთიერთობათა კომიტეტის თავმჯდომარე სოფიო ქაცარავამ „ტვ პირველზე“, გადაცემაში „ნატო პირველზე“ ისაუბრა.
„ევროკომისიის დასკვნით, ასოცირების ხელშეკრულების ფარგლებში დაგეგმილი რეფორმები სრულ თანხვედრაშია იმ რეფორმებთან, რასაც ჩვენ ვახორციელებთ და ეს ეხება დემოკრატიული ინსტიტუტების განვითარებას. თავისთავად მნიშვნელოვანია სამხედრო კომპონენტი, მაგრამ მეტი სტაბილურობა, მეტი უსაფრთხოება და სწორი განვითარება, ამისთვის გვინდა ნატო.
ნატო-ს მხრიდან პოლიტიკური განცხადება არაერთხელ გაკეთებულა საქართველოს ტერიტორიული მთლიანობის მხარდასაჭერად. 2017 წელი ამ მხრივ იყო თვალშისაცემი. საპარლამენტო ასამბლეის თბილისში ჩატარებაც იყო აღიარება, რომ ნატო საქართველოს მიიჩნევს ღირსეულ პარტნიორად. ტერიტორიული მთლიანობა,როგორც გამოწვევა შეიძლება მოგვარდეს მხოლოდ საერთაშორისო თანამეგობრობის მხარდაჭერით.საზოგადოება ხელს უწყობს საგარეო კურსს, რომელიც ჩვენ არ მოგვიგონია. დამოუკიდებლობის დღიდან ეს კურსი გაგვაჩნია, მაგრამ ბოლო წლების ინტენსოვობა ნატო-სთან ურთიერთობის არის თვალშისაცემი.
ნატოში გაწევრიანება რა თქმა უნდა არის მთავარი ამოცანა, მაგრამ პროცესსაც აქვს მნიშვნელობა. ყოველთვის თავს ვარიდებ კონკრეტული თარიღების და პერსპექტივების დასახელებას. საზოგადოებამ უნდა იცოდეს,რომ თვითმიზანი გაწევრიანების გარდა არის პროცესი და გზა. ამით ქვეყანა ძლიერდება. ნატოში სვლით ვიღებთ ძლიერ ეკონომიკას, ინსტიტუტებს, სტაბილურ ქვეყანას, რაც არის მთავარი. საქართველოში საზოგადოების მხარდაჭერა ნატოში გაწევრიანებისთვის არის გაცილებით მეტი, ვიდრე ბევრ ევროპულ ქვეყანაში, რუსული რბილი ძალა და დეზინფორმაციაც მხოლოდ ჩვენთვის არ არის გამოწვევა“ , – განაცხადა სოფიო ქაცარავამ.
მანანა ღოღობერიძე
