ქართულ ბაზარზე კიდევ ერთი ახალი ხელნაკეთი პროდუქციის ბრენდი გამოჩნდა. „გიშერი“ ორგანული, დეკორატიული კოსმეტიკის მწარმოებელი ბრენდია, რომელიც რამდენიმე თვის წინ შეიქმნა. ორმა ახალგაზრდამ ნინი რესულიძემ და მარიამ ღლონტმა ბიზნესი საკუთარი სლოგანის „სილამაზე არ უნდა იყოს ზიანის მომტანი“ ქვეშ გააერთიანეს და ყველასთვის ხელმისაწვდომი და ბუნებრივი პროდუქცია შექმნეს. „თბილისი თაიმსს“ ბრენდის ერთ-ერთი დამფუძნებელი ნინი რესულიძე „გიშერის“ შექმნისა და სამომავლო გეგმების შესახებ ესაუბრა.
მოგვიყევით, საიდან გაგიჩნდათ იდეა შეგექმნათ ორგანული კოსმეტიკის ბრენდი?
– დაახლოებით წელიწად-ნახევრის წინ მე და ჩემი მეგობარი ვმოგზაურობდით ბულგარეთში. აღმოვაჩინეთ, რომ სავაჭრო ცენტრებში თუ ტურისტულ ადგილებში იყიდებოდა ადგილობრივი წარმოების კოსმეტიკა განსხვავებული სურნელებითა და ეთერზეთებით. სწორედ აქედან გაგვიჩნდა იდეა, რომ მსგავსი სახის პროდუქცია გაგვეკეთებინა საქართველოში. ძალიან გვინდოდა ჩვენც გვქონოდა ისეთი კოსმეტიკის ბრენდი, რომელსაც საქართველოში ჩამოსული ტურისტები როგორც სუვენირს თან წაიღებდნენ. თანდათან დავხვეწეთ ჩვენი იდეა და შევქმენით ორგანული კოსმეტიკა, რომელიც ყველა ქალისთვის მისაღები და ხელმისაწვდომი იქნებოდა.
საიდან მოდის თავად ბრენდის სახელი „გიშერი“?
– ძალიან გვინდოდა ბრენდის სახელი ქართული და რაღაცის გამომხატველი ყოფილიყო. „გიშერი“ ავიღეთ ქართველებისთვის საამაყო ნაწარმოებიდან „ვეფხისტყაოსნიდან“, როგორც სილამაზისა და დახვეწილობის მეტაფორა.
გქონდათ თუ არა რაიმე გამოცდილება ამ კუთხით და როგორ შეძელით იდეის ბიზნესად ქცევა?
– ამ კუთხით გამოცდილება ნამდვილად არ გვქონია. მოყვარულის დონეზე, ჩვენთვის და ჩვენი მეგობრებისთვის ვამზადებდით ხოლმე პროდუქციას. საკმაოდ დიდი და სახიფათო ნაბიჯი გადავდგით, როდესაც ჩვენი პროდუქცია საზოგადოებას გავაცანით. თუმცა, ამ ყველაფერს, რა თქმა უნდა, წინ უძღოდა ტესტირების რეჟიმი, დერმატოლოგებთან მუდმივი კონსულტაციები. მუშაობის პროცესში ჩამოვაყალიბეთ ისეთი ფორმა, რომელიც არ იქნებოდა ზიანის მომტანი და დამზადდებოდა მხოლოდ ორგანული ნივთიერებებისგან. როდესაც მივხვდით რომ პროდუქცია დაიხვეწა, ამის შემდეგ გადავწყვიტეთ, რომ ღირდა საზოგადოებასაც შეეფასებინა ჩვენი კოსმეტიკა.
რითი გამოირჩევა ორგანული ნივთიერებებით დამზადებული პროდუქცია ქიმიურად დამზადებული კოსმეტიკისგან?
– დღეს მთელს მსოფლიოში არსებობს ტენდენცია, რაც შეიძლება ჯანსაღი, ბუნებრივი და ორგანული ნივთიერებებისგან მიიღონ კოსმეტიკა. ძალიან ბევრი ქიმიური კოსმეტიკის შემადგენლობაში არის ისეთი ნივთიერებები, რომლებიც საზიანოა ადამიანის ორგანიზმისთვის. ორგანული ნივთიერებებით დამზადებული კოსმეტიკა, ბევრად უფრო უსაფრთხო და ბუნებრივია. ორგანულადაა მიღებული პიგმენტებიც კი, რომლებიც ფერს აძლევს კოსმეტიკას.
ძირითადად რა სახის პროდუქციას ქმნით?
– გვაქვს ორი სახის ტუჩსაცხი, ტუჩის გლოსი ანუ თხევადი ტუჩსაცხი და მყარი ტუჩსაცხი, რომელიც არის როგორც გლუვი, ასევე კრემოვანი. გვაქვს 18 ფერის ფრჩხილის ლაქი და ასევე ფოსფორის ფრჩხილის ლაქები, რომლებიც ღამე ანათებს. გვაქვს აგრეთვე საბავშვო ტუჩის გლოსი, რომელსაც ასევე აქვს ჰიგიენური დატვირთვა, რომელიც სრულიად უსაფრთხოა ბავშვებისთვის.
როგორია ფასები და სად შეიძლება თქვენი პროდუქციის შეძენა?
– გვინდა, ჩვენი ბრენდი იყოს ყველასთვის ხელმისაწვდომი. მყარი ტუჩსაცხი ღირს 15 ლარი, ხოლო გლოსი-10 ლარი. რაც შეეხება საბავშვო ტუჩსაცხს ღირს 7 ლარი. ფრჩხლის ლაქის ფასები 7-დან 10 ლარის ფარგლებშია. გვაქვს ვებ-გვერდი, რომლის საშუალებითაც ხდება შეძენა. ხოლო 30 ნოემბრიდან ვიხსნებით „გალერეა თბილისში“ დ მომხმარებელს უკვე ადგილზე ექნება საშუალება შეიძინოს ჩვენი პროდუქცია.
როგორია თქვენი სამომავლო გეგემები?
– უახლოეს მომავალში ვგეგმავთ პროდუქციის დამატებას. მალე „გიშერი“ მომხმარებელს შესთავაზებს ტუჩის კონტურებს, თვალის ფანქრებს,თვალის ჩრდილებს, ტუშებს და ა.შ. სამომავლოდ, ძალიან გვინდა გავხსნათ ჩვენი მაღაზია, სადაც მომხამარებელი შეძლებს ადგილზე გაიკეთოს სასურველი მაკიაჟი.
მარიამ ლეკიაშვილი
