„უსაფრთხოების შესახებ“ კანონში ცვლილებების თანახმად, უსაფრთხოების სამსახურის თანამშრომლებს შესაძლებლობა ექნებათ აღმასრულებელ სტრუქტურებში პიროვნების გაუმჟღავნებლად დასაქმდნენ.
ამ კანონპროექტის თანახმად, უსაფრთხოების სამსახურის მოსამსახურეს, სამსახურისთვის კუთვნილების გაუმჟღავნებლად, შეიძლება თანამდებობა ეკავოს საქართველოს აღმასრულებელი ხელისუფლების ორგანოში, აგრეთვე სხვადასხვა საწარმოში, დაწესებულებასა და ორგანიზაციაში.
იმ შემთხვევაში თუ ამ დაწესებულებების ხელმძღვანელები მათ ვინაობას გაამხელენ, პასუხისმგებლობა დაეკისრებათ.
ასევე, უსაფრთხოების სამსახურის თანამშრომლებს ფარულად მსახურობის პერიოდი ჩაეთვლებათ შრომის საერთო სტაჟში.
„უსაფრთხოების შესახებ“ კანონში აღნიშნული ცვლილებები მთავრობის სტრუქტურული რეორგანიზაციის შესახებ მომზადებული საკანონმდებლო პაკეტის ნაწილია.
კანონპროექტის ამ ნაწილს რისკის შემცველად მიიჩნევს “ახალგაზრდა იურისტთა ასოციაცია”.
„უსაფრთხოების სამსახურის ყველა თანამშრომელისათვის ამ სახის უფლებამოსილების მინიჭება აჩენს რისკს აღდგეს მავნე პრაქტიკა, რაც გულისხმობს „მუდმივი მეთვალყურის“ ყოლას სახელმწიფო დაწესებულებებსა თუ კერძო სტრუქტურებში. ამავდოულად, არსებითად დააკნინებს 2015 წელს შინაგან საქმეთა სამინისტროს რეფორმის ფარგლებში, ე.წ. „ოდეერების“ ინსტიტუტთან დაკავშირებით განხორციელებულ პოზიტიურ ცვლილებებს.“- აცხადებს “საია” .
ადამიანის უფლებების სწავლებისა და მონტორინგის ცენტრი (EMC) კი წერს, რომ :
„”ოდეერის” ინსტიტუტი უსაფრთხოების სამსახურის ხელში არსებულ პრობლემურ მექანიზმს წარმოადგენს, რომლის გამოყენებითაც შესაძლოა საფრთხე შეექმნას ქვეყნის დემოკრატიულ მმართველობას, უსაფრთხოების სექტორი კი იქცეს სხვადასხვა საოზოგადოებრივი და პოლიტიკური ჯგუფების საქმიანობის და განწყობების მაკონტროლებელ ორგანოდ, ისევე როგორც ძალაუფლებაში მყოფი პოლიტიკური რეჟიმის დაცვის ინსტრუმენტად. შესაბამისად, ინიცირებული ცვლილება – მოსამსახურის აღმასრულებელი ხელისუფლების ნებისმიერ სახელისუფლებო ორგანოში, აგრეთვე სხვადასხვა საწარმოში, დაწესებულებასა და ორგანიზაციაში მივლინების შესახებ მიუღებელია და 2015 წელს განხორციელებული რეფორმით დადგენილი სტანდარტის მნიშვნელოვან გაუარესებად უნდა შეფასდეს,”- ნათქვამია EMC-ის განცხადებაში.
ნინი მაზიაშვილი