„ვიყავით ძალზე მდიდრები, არც სახელმწიფოს დახმარება დაგვჭირდებოდა ქონება რომ შენარჩუნებულიყო, ყველაფერი გაყიდულია“ , – კომპოზიტორთა კავშირის ქონების გასხვისებაზე კომპოზიტორმა ნუნუ გაბუნიამ „იბერიას“ ეთერში, გადაცემაში „ცენზურის გარეშე“ ისაუბრა.
„გული მწყდება,რომ გვქონდა დიდი ქონება,რომლითაც შემოქმედებასაც მოვუვლიდით, არაერთი გაჭირვებული კომპოზიტორი გვყავს. გული მწყდება,რომ მათზე არავინ ფიქრობს. იქნებ კავშირის ახალმა ხელმძღვანელობამ მაინც შეძლოს და რამე გააკეთოს ამ ადამიანებისთვის. წინა მთავრობამ ჩვენ დაგვაკარგვინა ბორჯომის შემოქმედებითი სახლი. აქ დასვენების გარდა, მუსიკასაც ვწერდით და საბჭოთა კავშირის მუს.ფონდის მიერ იყო აშენებული. კავშირის შენობა გაყიდულია დაახლოებით 450 ათას ევროდ და ვინმე ბიზნესმენმა ხაჩიძემ, რომელიც უკრაინაში მოღვაწეობს, შეიძინა ის. სახელმწიფომ მხოლოდ წაგვართვა ბორჯომის სახლი,სადაც იყო უამრავი ინსტრუმენტი და ყველა საჭირო ნივთი კომპოზიტორების სრულყოფილი საქმიანობისთვის.
კომპოზიტორთა კავშირს ეკუთვნოდა მეტალო-პლასტმასის ქარხანა მოსკოვის გამზირზე, აქედან შემოსული თანხა კი ჩვენს შემოქმედებას ხმარდებოდა. კავშირს ჰქონდა ასევე საქსოვი ქარხანა. მერიამ გვაჩუქა მაღალი დონის აპარატურა,რომელზეც ნაწარმოებები უნდა ჩაგვეწერა, მაგრამ არ ვიცი სად წაიღეს ეს აპარატურა, გამქრალია. ეს ყველაფერი კავშირის წინა მმართველობის დროს გასხვისდა. ქაღალდის კომბინატი თავის დროზე მილიონობით რუსული რუბლი დაჯდა, აქ უნიკალური იტალიური აპარატურა იდგა, თუმცა საბოლოოდ ის მხოლოდ 40 ათას დოლარად გაყიდეს“ , – განაცხადა ნუნუ გაბუნიამ.
მანანა ღოღობერიძე
