თურქეთის პრემიერ-მინისტრი აჰმედ დავუთოღლუ უახლოეს დღეებში თანამდებობის დატოვებას გეგმავს. ამის შესახებ ადგილობრივ და ევროპულ მედიაში ინფორმაცია მას შემდეგ გავრცელდა, რაც გუშინ ევროკომისიამ თურქეთისთვის ვიზალიბერალიზაციის მინიჭების რეკომენდაცია გასცა.
გავრცელებული ცნობით, დავუთოღლუს გადაწყვეტილების მიზეზი პრეზიდენტ რეჯეპ ტაიპ ერდოღანთან დაპირისპირებაა. როგორც მოსალოდნელია მმართველი პარტია მომავალ 15-20 დღეში პარტიის ყრილობას გამართავს, რომელზეც პარტიის ლიდერის არჩევა იგეგმება.
დავუთოღლუ თურქეთის პრემიერის პოსტს 2014 წლის შემდეგ იკავებს, მას შემდეგ რაც ერდოღანმა პრეზიდენტის თანამდებობა დაიკავა. თუმცა, ეს ორი მაღალჩინოსანი 2015 წლის ივნისის არჩევნების შემდეგ გარკვეულ საკითხებზე ვეღარ თანხმდებიან. აღსანიშნავია, რომ ევროკომისია ევროკავშირისა და თურქეთის შეთანხმებაში დავუთოღლუს მიიჩნევს პარტნიორად. დავუთოღლუს თანამდებობიდან წასვლა კი ევროპული მედიის ცნობით, თურქეთისთვის ვიზალიბერალიზაციის მინიჭების პროცესისთვის კარგი ნიშანი არ იქნება.
