მომავალი წლიდან, საგარეო საქმეთა სამინისტრო ახალი კანონპროექტის ინიცირებას გეგმავს. მიხეილ ჯანელიძის თქმით, ცვლილებები დიპლომატების როტაციის, ჯანდაცვის, დაზღვევისა და განათლების მიმართულებით უკვე მოხდა, ხოლო სამომავლო ინიციატივა დიპლომატების რეზერვის, საცხოვრებელი პირობებისა და სხვა ტექნიკური მხარეების მოგვარებას გულისხმობს.
„ჩვენ ვაპირებთ ახალი საკანონმდებლო ცვლილების ინიცირებას, რომელიც რეზერვის სამი წლიდან ხუთ წლამდე ვადის გაზრდას უკავშირდება. ანუ დიპლომატები, რომლებიც ვთქვათ სხვა სამსახურის გამო ან სხვა გადაწყვეტილების გამო, დროებით, დიპლომატიურ სამსახურს დატოვებენ, ისინი რეზერვში დარჩებიან არა სამი, არამედ ხუთი წლის ვადით“- აღნიშნა საგარო საქმეთა მინისტრმა, მიხეილ ჯანელიძემ.
კანონპროექტი, რომლის ინიცირებასაც საგარეო უწყების ხელმძღვანელი 2018 წელს მთავრობის სხდომაზე გეგმავს, აგრეთვე უცხო ქვეყნებში მივლენილი დიპლომატების ანაზღაურებასა და ცხოვრების პირობებსაც უკავშირდება.
ნინო ზარიძე
