„ლოპოტის სპეცოპერაციას დაადეს გრიფის საიდუმლო და დაიხურა. ამის შიში მაქვს,რომ პანკისის სპეცოპერაციაც ასევე არ დაიხუროს, საჯარო აღარ გახდეს. ჩვენ ვიცით, მაგრამ მაინც არ იქნას დამტკიცებული,რომ ეს ახალგაზრდები ჩართულები იყვნენ ტერორიზმში“ , – თემირლან მაჩალიკაშვილის ტერორიზმში შესაძლო მონაწილეობის შესახებ პანკისელმა უხუცესმა ხასო ხანგოშვილმა „ტვ პირველზე“, გადაცემა „პირველების“ ეთერში ისაუბრა.
„სპეცოპერაციის დაწყებისას ჩატაევი იყო შუამავალი და შემდეგ დარჩა იქ. არსებობდა ფაქტები,რომ ისინი გამოიძახეს და შემოიყვანეს საქართველოში. სიტყვა ტერორიზმთან როდესაც აკავშირებ რომელიმე სპეცოპერაციას, თავისთავად დახურულად მიმდინარეობს მისი გამოძიება. მიუღებელია,როდესაც პარლამენტის წევრები გამოდიან და არ აცდიან პროკურატურას დასკვნების დადებას, ამბობენ,რომ ტერაქტს აპირებდნენ, ხელს უწყობდნენ. ასეთი მიდგომა პანკისელი ხალხის შეურაცხყოფაა.
რომ დაებარებინათ, დაეკითხათ და იქ დაეკავებინათ,პრობლემა არ იქნებოდა. ხომ გაჩხრიკეს ყველას ოჯახი, ამოიღეს რამე იარაღი? ერთი ვაზნაც არაა ამოღებული. უნდა ვიცოდეთ ვინ არიან ეს ჩატაევთან დაკავშირებული ახალგაზრდები. არის ვარაუდი,რომ სირიაში იბრძოდნენ. მათ კარგად ეცოდინებოდათ საქართველოს კანონმდებლობა, რომ დააკავებდნენ და ურიერთობა პოლიციასთან არ უნდა ჰქონოდათ. პანკისელ ახალგაზრდებს სავარაუდოდ ჩატაევთან კავშირიც არ ჰქონიათ. ქისტების მენტალიტეტი არის დევნილისადმი თანაგრძნობა, ისინი ისტორიულად აბრაგებს ეხმარებოდნენ, მალავდნენ“ , -განაცხადა ხასო ხანგოშვილმა.
მანანა ღოღობერიძე
