დღეს სასტუმრო “შერატონ მეტეხი პალასში” საქართველო-უკრაინის ეკონომიკური თანამშრომლობის ერთობლივი მთავრობათაშორისი კომისიის მე-8 სხდომა გაიხსნება.
სხდომას საქართველოს ვიცე-პრემიერი, ენერგეტიკის მინისტრი კახა კალაძე და უკრაინის ვიცე-პრემიერი ალექსანდრე ვილკული გახსნიან. სხდომის ფარგლებში მხარეები ენერგეტიკულ, სოფლის მეურნეობის, ინფრასტრუქტურულ, სატრანსპორტო და განათლების სფეროებში თანამშრომლობის პერსპექტივებს განიხილავენ. ასევე იგეგმება ურთიერთთანამშრომლობის რამდენიმე დოკუმენტის გაფორმება.
კომისიის სხდომის შემდეგ ორი ქვეყნის ვიცე-პრემიერები ერთობლივ პრესკონფერენციას გამართავენ.
შეგახსენებთ, რომ უკრაინის სამთავრობო დელეგაცია ვიცე-პრემიერის ალექსანდრ ვილკულის ხელმძღვანელობით თბილისში, ორდღიანი სამუშაო ვიზიტით იმყოფება. დელეგაციაში სხვა ოფიციალურ პირებთან ერთად, უკრაინის ენერგეტიკის, ეკონომიკის, სოფლის მეურნეობის, ინფრასტრუქტურის, განათლებისა და საგარეო საქმეთა მინისტრების მოადგილეები შედიან.
25.06.13