ენის სახელმწიფო დეპარტამენტი საზღვარგარეთ მცხოვრები ქართველებისთვის ონლაინ-რეჟიმში ქართული ენის სწავლებას გეგმავს. ენის სახელმწიფო დეპარტამენტის თავმჯდომარის, გიორგი ალიბეგაშვილის განცხადებით, ამ ინიციატივას, სავარაუდოდ, სახელმწიფო დააფინანსებს, თუმცა შესაძლებელია, ეს კომერციული საქმიანობის ნაწილი იყოს.
გიორგი ალიბეგაშვილი ასევე ამბობს, რომ ემიგრაციაში დაბადებულ თაობას, წარმოდგენა არ აქვს ქართულ კულტურაზე და ენასაც ვერ ფლობენ და მიუხედავად იმისა, რომ ბევრგან არის საკვირაო სკოლები, ეს საკმარისი არ არის.
სახელმწიფო ენის დეპარტამენტი, რომელსაც გიორგი ალიბეგაშვილი ხელმძღვანელობს და რომელიც რამდენიმე თვის წინ შეიქმნა, 2018 წლის ბიუჯეტიდან ნახევარი მილიონი ლარით დაფინანსდება.
ცნობისთვის: საქსტატის 2014-2016 წწ. მონაცემების მიხედვით, იზრდება ემიგრანტთა ნაკადი საქართველოდან. 2014 წელს მათი რაოდენობა 88,704 შეადგენდა, რომელთა შორის 69,855 საქართველოს მოქალაქე იყო. 2015 წელს კი, უკვე 95,965 ემიგრანტი წავიდა საქართველოდან, რომელთა უმრავლესობა (67,452) საქართველოს მოქალაქე იყო, ხოლო 2016 წელს ემიგრანტთა რიცხვი ოდნავ გაიზარდა და 98,288-ს მიაღწია, თუმცა მათ შორის საქართველოს მოქალაქეთა რაოდენობა არ გაზრდილა, პირიქით შემცირდა (64,705). ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინიტრის აპარატის ინფორმაციით, 2017 წლის 28 მარტიდან 20 ოქტომბრამდე პერიოდში ევროკავშირის შენგენის ზონაში უვიზო მიმოსვლით საქართველოს 161 885-მა მოქალაქემ ისარგებლა, საიდანაც უვიზოდ მიმოსვლისთვის გათვალისწინებული 90-დღიანი ვადა 9 875-მა მოქალაქემ დაარღვია.
ნინი მაზიაშვილი
