ზოგჯერ ხელოვნება ქმნის ადამიანს და ან ადამიანი ქმნის ხელოვნებას. საბოლოოდ, ისინი ერთ განუყრელ მთლიანობად იქცევიან ხოლმე და ერთმანეთის გარეშე არსებობა ვეღარ წარმოუდგენიათ. ასე აღმოაჩინა თავისი თავი ნინა ლონდარიძემ ხელოვნებაში და გადაწყვიტა, საკუთრი თავი ნამუშევრებში გამოეხატა. „ჰობი ჯორჯია“ ხელნაკეთი ჩანთების სტარტაპია, რომელიც რამდენიმე თვის წინ გამოჩნდა ბაზარზე. „თბილისი თაიმსთან“ საუბრისას ბრენდის დამფუძნებელი ჩანთების შექმნისა და იმ პრობლემების შესახებ საუბრობს, რომლებიც განვითარების ეტაპზე შეხვდა.
თავდაპირველად თქვენს შესახებ რომ მომიყვეთ, საიდან გაგიჩნდათ იდეა შეგექმნათ ხელნაკეთი ნივთები?
– ეს ის არის, რაც თან დამყვება მთელი ცხოვრება უბრალოდ ბოლო პერიოდში გავაცნობიერე, რომ შემიძლია საყვარელი საქმე პროფესიად ვაქციო და ასეც მოვიქეცი. „ჰობი ჯორჯია“ ქართულ ბაზარს რამოდენიმე თვის წინ გავაცანი. რეალურად გააზრებაც ვერ მოვასწარი ისე მიიქცია ჩემმა ჩანთებმა უამრავი ადამიანის ყურადღება. ყოველდღიურად უამრავი შეტყობინება მომდის. მინდა თქვენი საშუალებით მადლობა გადავუხადო ჰობის ყველა გულშემატკივარს ასე რომ გვანებივრებენ კომპლიმენტებით.
რა სახის ნივთებს ქმნით ძირითადად და რა მასალა გამოიყენება მათ შესაქმნელად?
– ამ ეტაპზე ვმუშაობ მხოლოდ ჩანთების დიზაინზე. გენდერული ბალანსი რომ არ დავარღვიო, უახლოეს მომავალში შემოგთავაზებთ მამაკაცის ხაზს, სადაც გათვალისწინებული იქნება საფულეებიც. რაც შეეხება მასალას, მხოლოდ ერთი ფაქტურით არ შემოვიფარგლები. ვიყენებ ტექსტილს, ტყავს როგორც ორგანულს, ასევე ხელოვნურს, თექას, ზამშს და ასე შემდეგ.
როგორია შექმნის პროცესი და რა ადგილი უჭირავს ხელოვნებას თქვენ ცხოვრებაში?
– ჰობი ის საქმიანობაა რომლიც ყველაზე დიდ სიამოვნებას გვანიჭებს, ხოდა მეც ყოველდღიურად ვქმნი დიზაინს თქვენთვის და ვბედნიერდები ამით. დარწმუნებული ვარ თითოეული მომხმარებელი გრძნობს იმ პოზიტივს, რასაც მე მათ ჩანთებში ვდებ. მას შემდეგ რაც რადიკალური ნაბიჯი გადავდგი და გადავწყვიტე საკუთარი თავისთვის სამსახური თავად შემექმნა მთელი ჩემი ცხოვრება მოიცვა ხელოვნებამ. სხვანაირად არც წარმომედგინა, რადგან როდესაც რაიმეს ქმნი, ჩემი აზრით, აუცილებელია მარაგში გქონდეს უამრავი ემოცია, ემოციების გამოწვევა კი მთლიანად ხელოვნების პრეროგატივაა.
რა სირთულეები შეგხვდათ ბიზნესის დაწყებიდან დღემდე და როგორ შეძელით თავის დამკვიდრება?
– ამ ეტაპზე ყველაზე დიდ სირთულეს საქართველოში ჩემთვის საჭირო ხელსაწყო დანადგარების და მასალის არარასებობა წარმოადგენს. ხშირად მიწევს მათი გამოწერა, რაც ვადებთან არის დაკავშირებული და დისკომფორტს მიქმნის. ვფიქრობ, ბაზარზე თავის დამკვიდრებას ჰობი თავისი უნიკალური ხელწერის საშუალებით ახერხებს.
რითი ხართ გამორჩეული სხვებისგან? მთავარი განმასხვავებელი ნიშა
– ეს არის სფერო, სადაც თავს შეზღუდვებს არ ვუწესებ. გადმომაქვს ის ფერები რაც ჩემშია, არ ვფიქრობ იმაზე თუ რა იქნება ტრენდული ან გაყიდვადი ან რომელი ფერია მოდაში წელს. არ ვბაძავ, უბრალოდ ვქმნი და მიხარია, რომ საზოგადოებამ ამ ყველაფერს კრეატივი უწოდა. თუ ერთხელ მაინც გინახავთ ჰობის ჩანთა დარწმუნებული ვარ, ის არასდროს აგერევათ სხვაში.
როგორია ფასები და როგორ ხდება შეძენა?
– თავს ვიწონებ დემოკრატიული ფასებით, მინდა მაქსიმალურად ხელმისაწვდომი იყოს ყველასთვის. (ფასები იწყება 35 ლარიდან) შეძენა ხდება ონლაინ, კურიერული მომსახურეობა უფასოა.
სამომავლო გეგმების შესახებ რომ მომიყვეთ, რას გეგმავთ მომავალში?
– სამომავლოდ უამრავი გეგმა მაქვს და ექსპორტზე გასვლა ამ გეგმებში შედის, რა თქმა უნდა. ამ ეტაპზე დეტლების გასაჯაროებისაგან თავს შევიკავებ თუმცა უახლოეს მომავალში ვაპირებ სასიამოვნოდ გაგაოცოთ.
მარიამ ლეკიაშვილი
