Hand4Help ერთადერთი ქართული სტარტაპია, რომელიც ზედა კიდურის პროთეზებზე მუშაობს. მისი შექმნილი პროთეზები, ბაზარზე არსებულ სხვა პროთეზებთან შედარებით, 10-ჯერ უფრო იაფი დაჯდება. ეს იმ ტექნოლოგიური გადაწყვეტების შედეგია, რომელსაც Hand4Help პროტოტიპირებისას იყენებს.
კომპანია Hand4Help-მა, რომელიც ექვსმა ნიჭიერმა ახალგაზრდამ დააფუძნა, 2016 წელს “სტარტაპ საქართველოში” მიიღო მონაწილეობა და გამარჯვებაც მოიპოვა. როგორც ახალგაზრდა სტარტაპერები ჰყვებიან პატარა გოგონას დახმარების სურვილმა გადააწყვეტინათ შეექმნათ ინოვაციური ხელის პროთეზი.
“დეტალურად გავეცანით დღეს ბაზარზე არსებულ ხელის პროთეზებს და ძალიან ბევრი პრობლემა აღმოვაჩინეთ. პროტოტიპირება ძალიან მარტივი გახადა 3D პრინტერმა და ARDUINO-მ, რომელიც პროგრამირებადი მიკროკონტროლერია. მასში იწერება კოდი, რომელსაც ელექტრონული მოწყობილობები მოქმედებაში მოჰყავს. ARDUINO-ს უპირატესობა დაბალი ფასი და სიმარტივეა. დაბალფასიანი მიკროკონტროლერების განვითარებამდე პროტოტიპირება გაცილებით რთული და ძვირი იყო. შესაბამისად პროთეზი ყველასთვის არ იყო ხელმისაწვდომი”.
როგორც ცნობილია ხელის პროთეზების ფასი 5 000 -100 000 $-მდე მერყეობს, ასევე ბავშვებისთვის პროთეზები ფაქტობრივად არ მზადდება ან ის სატარებლად საკმაოდ მძიმეა.რაც მნიშვნელოვან დაბრკოლებას უქმნის მათ განვითარებაში.
„ჩვენ ჩვენი პროდუქტით არ ვცდილობთ შეზღუდული შესაძლებლობები აღმოვფხვრათ, ამიტომ არ ვქმნით ნამდვილ ხელზე მიმსგავსებულ მოდელებს, ჩვენ ამ შეზღუდულ შესაძლებლობებს ვაქცევთ სუპერ შესაძლებლობებად და ეს არის ჩვენი კომპანიის სლოგანიც“.
დღეს, Hand4Help-ის მაღალტექნოლოგიური მოდელი უნიკალური შესაძლებლობებისაა – მისი გამოყენება შეიძლება კომუნიკაციაში, ინტერაქციაში და ამასთან, აქვს სმარტ ფუნქციაც – შეუძლია კომპიუტერთან ინტერაქცია და ერთგვარი „პულტის“ ფუნქციის შესრულებაც. მაგალითისთვის, სმარტფონის დისტანციურად მართვა, ზარების პასუხი კუნთის დაჭიმვით და ა.შ.
Hand4help Community აერთიანებს იმ ადამიანებს, ვისაც დახმარება სჭირდება და მათ, ვისაც სხვისი დახმარების სუვრვილი აქვს. ეს იქნება იდეები, დიზაინი თუ უშუალოდ ხელის პროთეზის აწყობაში მონაწილეობის მიღება.ახალგაზრდა სტარტაპერები Hand4help Community-ის ფარგლებში სრულიად უანგაროდ ამზადებენ ხელის პროთეზებს, რომლებიც აღჭურვილია იმ მინიმალური ფუნქციებით, რაც საჭიროა ყოველდღიური მოხმარებისთვის.
სტარტაპის დამფუძნებლები პროდუქტის განვითარებაზე მუდმივად მუშაობენ და უახლოეს მომავალში ხელის პროთეზისთვის სხვა ფუნქციების დამატებასაც აანონსებენ.
მარიამ ლეკიაშვილი
