მასწავლებლებისთვის პროფესიული განვითარების ელექტრონული კურსები შემუშავდება.
პროექტი ათასწლეულის გამოწვევის ფონდის მიერ არის ინიცირებული და ის პედაგოგებს საშუალებას მისცემს, მათთვის სასურველ დროსა და ადგილას, ონლაინ რეჟიმში გაიარონ ტრენინგები. კურსები მოიცავს, როგორც ზოგად პროფესიულ პროგრამებს, ასევე საგნობრივ (ფიზიკა, ქიმია, ბიოლოგია, მათემატიკა, გეოგრაფია, ინგლისური) მოდულებს.
კურსების შემუშავება დასრულდება 2019 წლის აპრილში და პილოტირების შემდეგ, ხელმისაწვდომი გახდება ყველა დაინტერესებული მასწავლებლისთვის.
როგორც პროექტის პრეზენტაციაზე განათლებისა და მეცნიერების მინისტრის მოადგილემ ლია გიგაურმა განაცხადა, პროგრამა ხელმისაწვდომი იქნება ნებისმიერი დაინტერესებული პირისთვის და ის დაეხმარება არა მხოლოდ საბუნებისმეტყველო საგნების პედაგოგებს, არამედ ნებისმიერი საგნის მასწავლებელს.
„პირველად პროფესიული განვითარების ისტორიაში თითოეულ მასწავლებელს, თავისი მიზნებიდან გამომდინარე, მოსწავლეზე ორიენტირებული საკლასო განათლების და პროცესის მაღალი ხარისხის უზრუნველსაყოფად, ექნება საშუალება, რომ კლასიდან გაუსვლელად მისთვის საინტერესო თემატიკაზე მიიღოს მისთვის საინტერესო ტრენინგი“, – განაცხადა ლია გიგაურმა.
მისივე თქმით, შეიძლება ელექტრონული ტრენინგები სქემაში აისახოს და მასწავლებლებს ტრენინგების გავლის საფუძველზე კრედიტქულები მიენიჭოს.
„ათასწლეულის გამოწვევის ფონდი – საქართველო“, „მასწავლებელთა და სკოლის დირექტორთა პროფესიული განვითარების პროექტის“ ფარგლებში, მასწავლებლებისა და საჯარო სკოლების დირექტორთა ტრენინგებს 2016 წლიდან ატარებს. პროექტის სრული ბიუჯეტი 14 მილიონი აშშ დოლარია.
ნინი მაზიაშვილი
