უცნაური და უჩვეულო თუმცა რეალობაა ის, რომ ტროიკული ხილისგან შესაძლებელია დეკორატიული ნივთების, სანათების დამზადება. მთავარია იდეა, კრეატივი, სულ ცოტა ტექნიკა და შესაძლებელია გადასაგდებად გამზადებული ნივთისგან არაჩვეულებრივი დიზაინის ნამუშევარი შექმნათ. ასე მოხდა მადონა სურმანიძისა და ირაკლი კობაურის შემთხვევაში, მათთვის შთაგონების წყაროდ ბოსტნეულის ერთ-ერთ მაღაზიაში ნაყიდი ქოქოსი იქცა. „თბილისი თაიმისთან“ მადონა სურმანიძე სანათების შექმნისა და სამომავლო გეგმების შესახებ საუბრობს.
მოგვიყევით COCOnut-ზე, საიდან გაგიჩნდათ მისი შექმნის იდეა?
– სამსახურიდან სახლში დაბრუნებისას, ხშირად ვსტუმრობდით ბოსტნეულის ერთ პატარა მაღაზიას. ერთხელაც, იქ შესულებს გასაყიდად დაგვხვდა ქოქოსი. მიუხედავად იმისა, რომ არასდროს მქონია ქოქოსის გასინჯვის სურვილი, იმ დღეს, ჩემი ინიციატივით წამოვიღეთ, იდეაში, ეგზოტიკური საღამოს მოსაწყობად. თუმცა, ქოქოსმა დიდად იმედები ვერ გაგვიმართლა და გადასაყრელად გავამზადე. ირაკლიმ, რომელიც მეორე დღეს სოფელში მიდიოდა, წაიღო ქოქოსი და საღამოს გამომიგზავნა რაღაცა ნივთის ფოტო, რომელიც ლამაზად ანათებდა. მოკლედ, სასანთლე გააკეთა, რომელმაც არამარტო ჩემი, მეგობრების აღფრთოვანებაც გამოიწვია და მივხვდი, რომ შესაძლებლობა გვქონდა, პრაქტიკული ნივთისთვის არატრადიციული ფორმა მიგვეცა და ასე დაიბადა ქოქოსის ხელნაკეთი სანათების იდეა.
რა მასალით ქმნით ნამუშევრებს?
– ძირითადად სანათები იქმნება ქოქოსით და დამატებით მასალად ვიყენებ ნებისმიერ ხეს, რომელიც მომეწონება. დამზადების პროცესი ცოტა რთულია იმ მხრივ, რომ ზოგჯერ ტყდება ქოქოსი და მთელი დღის წვალება ხშირად წყალში მეყრება, მაგრამ ვიწყებ ისევ თავიდან და საბოლოოდ იღებს იმ სახეს, რაც მინდოდა, რომ ჰქონოდა. ეს საქმე დიდ მოთმინებას და ნებისყოფას მოითხოვს.
რითი ხართ გამორჩეულები?
– საქართველოში ბევრი ხელნაკეთი ნივთი იქმნება და საკმაოდ კარგებიც, ბევრ მათგანს თავისებური ინდივიდუალიზმი ახასიათებს, ჩემს ნამუშევრებს კი გამოარჩევს ის, რომ არის ქოქოსის სანათები, რაც ინოვაციაა და პირველია საქართველოში. ყოველ შემთხვევაში, მე არ შემხვედრია, აქედან გამომდინარე, ჯერჯერობით სხვა მასალა არ მიცდია.
გარდა სანათებისა, რას სთავაზობთ მომხმარებლებს და სად ხდება თქვენი პროდუქტის რეალიზება?
– ახლახან დავიწყეთ ქოქოსის დასაკიდი საყვავილეების დამზადება – გაზაფხულისთვის ერთ-ერთი აქტუალური თემაა. რაც შეეხება პროდუქტის გავრცელების არხებს, ჯერჯერობით, მხოლოდ ინტერნეტ სივრცეში, იქიდან გამომდინარე, რომ ორივე დაკავებულები ვართ, ჩვენი ძირითადი საქმიანობით და თან 1 წლის პატარა გვყავს, დიდ დროს ვერ ვუთმობდით აქამდე „ქოქონათს“, თუმცა უკვე სერიოზულად დავკავდით ამ საქმიანობით.
როგორია თქვენი სამომავლო გეგემები?
– საკმაოდ საინტერესო ეტაპი გვაქვს. ყველა აღფრთოვანებული ხვდება ჩვენს პროდუქციას და ვინც ყიდულობს, გვეუბნება, რომ ძალიან ორიგინალურია და პირველად ნახა ქოქოსისგან დამზადებული სანათი. მოკლედ, წინ ძალიან საინტერესო გამოწვევები და ნაბიჯები გველოდება. ორივეს გვჯერა, რომ ამ წამოწყებას დიდი მომავალი აქვს, მთავარია, სწორი მენეჯმენტი ჩვენი მხრიდან.
მარიამ ლეკიაშვილი
