მიუხედავად ბოლო წლებში ჩვენს ქვეყანაში გენდერული თანასწორობის კუთხით წინ გადადგმული ნაბიჯებისა, სამწუხაროდ, გენდერული თანასწორობის მიღწევა კვლავ გადაუჭრელ პრობლემად რჩება. ბოლო ექვსი წლის განმავლობაში საქართველოში დაახლოებით 32 ათასი სელექციური აბორტი გაკეთდა. იგეგმება თუ არა სელექციური აბორტის კანონით აკრძალვა და როგორ გაკონტროლდება ეს კანონი, ასევე, იგეგმება თუ არა რაიმე სახის პროგრამები და ცვლილებები გენდერული აბორტის შემცირებისთვის, ამ კითხვებზე პასუხის გასაცემად, “თბილისი თაიმსი“ ჯანდაცვის სამინისტროს დაუკავშირდა.
„სელექციური აბორტის შესახებ საქართველოში ოფიციალური სტატისტიკა არ არსებობს, რაც იმას ნიშნავს, რომ აბორტის მიზეზებში არავინ უთითებს სქესის შერჩევას. თუმცა არსებობს კვლევები, რომლებიც მიუთითებენ ამ პრობლემის არსებობაზე ჩვენს ქვეყანაში. ამასთან, გამოხატულია დაბადებისას სქესთა დარღვეული თანაფარდობის მაჩვენებლები.
,,ორსულობის ხელოვნური შეწყვეტის განხორციელების წესების დამტკიცების თაობაზე“ საქართველოს შრომის, ჯანმრთელობისა და სოციალური დაცვის მინისტრის 2014 წლის 7 ოქტომბრის №01-74/ნ ბრძანების დანართი 1-ის მე-14 პუნქტით აკრძალულია სელექციური აბორტი: ,,დაუშვებელია სქესის შერჩევის მიზნით ორსულობის ხელოვნური შეწყვეტა გარდა იმ შემთხვევებისა, როცა აუცილებელია სქესთან შეჭიდული მემკვიდრეობითი დაავადების თავიდან აცილება“; რაც შეეხება სქესის დიაგნოსტიკის შეზღუდვის საკითხს, აღნიშნულის დასარეგულირებლად სამინისტრო ექსპერტებტან ერთად მუშაობს ორსულობის ულტრასონოგრაფიული მონიტორინგის პროტოკოლზე, რომელშიც განისაზღვრება ორსულობის ის ვადა, როდემდეც შეუძლებელია სქესის დიაგნოსტირება“.
მაკა გოგებაშვილი
