ქათმის მწარმოებელი კომპანია ,,ჩირინა“ ბიზნესის ახალი სეგმენტის ათვისებას გეგმავს და ,,ბიუ-ბიუს“ ბრენდით სოსისებს და ძეხვეულს გამოუშვებს.
როგორც კომპანიაში „თბილისი თაიმსთან“ საუბრისას აცხადებენ პროდუქციის გამოშვება 2019 წლიდან იგეგმება. ამ ეტაპზე შენობის პროექტირება მიმდინარეობს.
„ვაპირებთ ვაწარმოოთ სოსისები და ძეხვეული; ასევე მარინირებული და შებოლილი ხორცპროდუქტები.პროდუქცია გათვლილი იქნება ადგილობრივი ბაზრისთვის, თუმცა ვგეგმავთ ასევე მის ექსპორტს მეზობელ ქვეყნებში.“
ამ დროისთვის კომპანია თვეში 1200 ტონა ქათმის ხორცს აწარმოებს, სამომავლოდ, ეს რიცხვი 1700 ტონამდე გაიზრდება.
„ჩვენ გამოვუშვებთ სოსისებს და სხვა პროდუქციას უფრო მეტად ბავშვებისთვის და დიეტურს. პროდუქცია დამზადდება ბიუ-ბიუს ქათმისგან.ამ კუთხით სრულად ვგეგმავთ ბაზრის ათვისებას.“
კომპანია „ჩირინა“ ქართულ ბაზარზე 2013 წელს გამოჩნდა. მისი ბრენდი „ბიუ-ბიუ“ ამიერკავკასიაში ყველაზე მასშტაბური მეფრინველეობის კომპლექსია. ამჟამად კომპანიას საწარმოები აქვს მარტყოფში, სართიჭალასა და სოფელ გამარჯვებაში.
მარიამ ლეკიაშვილი
