სრულიად საქართველოს მუსლიმთა სამმართველომ სასტუმრო ამბასადორის საკონფერენციო დარბაზში 2016 წლის ანგარიში წარადგინა. ღონისძიებას ესწრებოდნენ სასულიერო პირები, სახელმწიფო მოხელეები, მუსლიმური ქვეყნების საელჩოების წარმომადგენლები, სწავლულები და საზოგადო მოღვაწეები. ანგარიშის გაკეთების მიზანი იყო გამჭვირვალეობის პრინციპის დაცვა, გაწეული საქმიანობის შესახებ საზოგადოების ინფორმირება, მათი შენიშვნების და რეკომენდაციების მოსმენა.
რელიგიის საკითხთა სახელმწიფო სააგენტოს თავმჯდომარემ მუსლიმთა სამმართველოს ერთი წლის განმავლობაში გაწეული საქმიანობა დადებითად შეაფასა და აღნიშნა, რომ სახელმწიფო ყოველთვის ხელს შეუწყობს ტრადიციული ისლამის განვითარებასა და რადიკალური იდეოლოგიების საქართველოში ფეხის მოკიდებას საშუალებას არ მისცემს.
ბატონ ზაზა ვაშაყმაძემ აღნიშნა, რომ მუსლიმი თემი საქართველოში რაოდენობით მეორე ადილზეა და შესაბამისად სახელმწიფოს ყურადღებაც მის მიმართ განსაკუთრებულია. ისინი ყველაფერს აკეთებს რათა მუსლიმ თემს უფრო უკეთესი პირობები ჰქონდეს ღვთისმსახურების შესრულებაში. სახელმწიფომ ბოლო ოთხი წლის განმავლობაში უამრავი ნაბიჯი გადადგა მუსლიმი თემის საკეთილდღეოდ და მომავალშიც მზად არის მუსლიმთა სამმართველოსთან თანამშრომლობისთვის.
„თბილისი თაიმსი“ გთავაზობთ სრულიად საქართველოს მუსლიმთა სამმართველოს 2016 წლის ანგარიშს, სადაც ვკითხულობთ:
ახლად აშენდა, გარემონტდა და განბანვის ოთახები მოეწყო 46 მეჩეთში. 4 მეჩეთში ხალიჩები დაიგო. სხვადასხვა საჭიროების ნივთები გადაეცა 11 მეჩეთს. 130 მეჩეთი დარეგისტრირდა მუსლიმთა სამმართველოს სახელზე. ხმის გამაძლიერებლებითა და სხვა ტექნიკით აღიჭურვა 45 მეჩეთი.
განახლდა მუსლიმთა სამმართველოს ოფიციალური ვებ გვერდი. Muslimmedia.ge-სა და Youtube-ზე დღემდე 350 გადაცემა ჩაიწერა. ოჯახისათვის ჯანსაღი, ეთიკური, სამეცნიერო და აღმზრდელობითი სტატიები განთავსდა Aile.ge-ზე. ტელეფონებისთვის 150-ზე მეტი APK ფორმატის წიგნი და რელიგიური მასალა მომზადდა.
ასევე დაიბეჭდა 35 წიგნი 90000 ტირაჟით; 16 სახეობის გაზეთი-70000 ცალი; 10 დასახელების ჟურნალი-13000 ცალი; 8 თემატიკის, 46000-ი ბროშურა; 3 სახეობის-20000-ი კალენდარი; დაიბეჭდა და განთავსდა 30 ცალი ბანერი და პოსტერი.
2016 წლისათვის სამმართველოს შუამდგომლობის ნაწილი დაკმაყოფილდა და რამდენიმე მუსლიმი მსჯავრდებული შეწყნარებული იქნა, ხოლო რამდენიმეს სასჯელის ვადა შეუმცირდა. სასულიერო პირებს მიეცათ საშუალება ისარგებლონ არასამხედრო ალტერნატიული შრომითი სამსახურით.
მიღწეულ იქნა შეთანხმება შესაბამის უწყებებთან, რათა ნოვრუზის, რამაზანისა და ყურბან ბაირამის დღეებში სასჯელაღსრულების დაწესებულებებში მუსლიმ მსჯავრდებულებს სადღესასწაულო საკვები მიაწოდონ ოჯახის წევრებმა. გაფორმდა ხელშეკრულება SOCAR Georgia Gas-თან 22 ახლად გაზიფიცირებული მეჩეთის სიაში დამატებისთვის და ოთხ ხორცის მწარმოებელ ფირმასთან “Halal”-ის სერთიფიკატის გაცემის მიზნით.
სამლოცველო ოთახები გაიხსნა სამხედრო ნაწილებში მუსლიმი ჯარისკაცებისთვის.
მუსლიმთა სამმართველომ 2016 წელს შემდეგი სახის ქველმოქმედება გასწია:
-წინადაცვეთის აქცია-200 ბავშვს გაუკეთდა ოპერაცია;
-უნარშეზღუდულების დახმარება-24 ეტლი იქნა გადაცემული;
-რამაზანის (მარხვის) თვეში 1500 გაჭირვებულ ოჯახს პროდუქტის ყუთი გადაეცა;
-ყურბან ბაირამზე 15000-ზე მეტ ოჯახს ყურბნის ხორცი დაურიგდა;
-შემოწირულობების ყუთიდან დახმარება გაეწია 800-ზე მეტ უკიდურესად გაჭირვებულ ოჯახს;
-უპატრონო ბავშვთა თავშესაფრისთვის ჯამში 4000 ლარზე მეტი საჭირო ნივთი იქნა შესყიდული.
ჩატარდა სამეცნიერო სემინარები და კონფერენციები, მოეწყო წიგნის პრეზენტაციები, შემეცნებითი შეჯიბრები, კონკურსები მოზარდებსა და ზრდასრულებს შორის, გაიმართა შეხვედრები, როგორც სასულიერო პირებთან, ასევე მოსახლეობასთან საქართველოს 100-ზე მეტ ყველა იმ კუთხეში სადაც მუსლიმები ცხოვრობენ.
2016 წელს პომპეზურად აღინიშნა 22 ადგილას წმინდა პირების მოსახსენიებელი დღეები. იფთრის ვახშამი გაიმართა ოცდაათ ქალაქს, რაიონსა თუ სოფელში; ყურბან ბაირამის ღონისძიება ჩატარდა 3 ადგილას, ხოლო მევლუდისა და კანდილების დღეებში ღონისძიებები გაიმართა 16 ადგილას.
პილიგრიმობაში ჩართული იყო 36 კაციანი მომლოცველთა ჯგუფი, რომლებმაც 20 დღით მონაწილობა მიიღო ჰაჯობის რიტუალში, ხოლო მეშედის რიტულაში 80 კაციანმა ჯგუფმა.
შედგა 16-ჯერ საზღვარგარეთ ვიზიტი- აზერბაიჯანში, თურქეთში, ერაყსა და ირანში-კონფერენციებზე, ოფიციალურ ვიზიტებზე ან ქვეყნის წარჩინების მიზნით მივლინებულ იქნენ სხვადასხვა პირები.
სოფიკო ნინიკაშვილი
