იუსტიციის სამინისტროში საპროკურორო საბჭოს პირველი სხდომა გაიმართება, რომელსაც იუსტიციის მინისტრი თეა წულუკიანი უხელმძღვანელებს.
საპროკურორო საბჭოს წევრები − პროკურორთა კონფერენციის მიერ არჩეული 8 პროკურორი, იუსტიციის უმაღლესი საბჭოს მიერ წარდგენილი ორი მოსამართლე წევრი, უმრავლესობიდან დასახელებული დეპუტატი ეკა ბესელია და პარლამენტის მიერ არჩეული სამეცნიერო წრეებისა და არასამთავრობო სექტორის წარმომადგენლები პოლიკარპე მონიავა და ირმა ჭკადუა − დღეს საპროკურორო საბჭოს ფორმატში პირველად შეიკრიბებიან.
საპროკურორო საბჭო კოლეგიური ორგანოა, რომელიც იუსტიციის სამინისტროსთან იმუშავებს. მას საბჭოს თავმჯდომარე − იუსტიციის მინისტრი ხელმძღვანელობს. საპროკურორო საბჭოს მიზანი საქართველოს პროკურატურის დამოუკიდებლობისა და გამჭვირვალობის, აგრეთვე, მისი ეფექტიანი მუშაობის უზრუნველყოფაა.
საპროკურორო საბჭოს ფუნქციებია: დაამტკიცოს საქართველოს მთავარი პროკურორის კანდიდატურა, დანიშნოს საგანგებო პროკურორი, წარუდგინოს პარლამენტს მთავარი პროკურორის თანამდებობიდან გათავისუფლების წინადადება, განახორციელოს მთავარი პროკურორისა და მისი მოადგილეების წინააღმდეგ დისციპლინური სამართალწარმოება. საპროკურორო უფლებამოსილების განხორციელების პროცესში საპროკურორო საბჭო არ ჩაერევა.