თბილისის მერია 2019 წელს ვაკის პარკს და ვერის ბაღს რეაბილიტაციას ჩაუტარებს. ამის შესახებ თბილისის მერმა კახა კალაძემ დედაქალაქის მთავრობის დღევანდელ სხდომაზე განაცხადა.
კალაძის თქმით, ორივე ადგილთან დაკავშირებით უკვე მიმდინარეობს საპროექტო სამუშაოები.
“როცა პროექტი დასრულდება, მომავალ წელს დავიწყებთ სარეაბილიტაციო სამუშაოებს. შეიქმნება სპეციალური კომისია, რომელიც წინადადებებს მიიღებს. შეიძლება ითქვას, რომ ამ პარკების არსებობიდან ასეთი მასშტაბური სამუშაოები არ განხორციელებულა რაც დაგეგმილი გვაქვს. საქალაქო პარკების რეაბილიტაცია მნიშვნელოვანია, რადგან იქ არსებული მდგომარეობა არის საგანგაშო და მძიმე. ყველაფერი უნდა გავაკეთოთ, რომ ეს მიმართულება გახდეს პოპულარული და ადამიანებსაც სურვილი გაუჩნდეს შევიდეს პარკებში და ეკოლოგიურად სუფთა გარემოში დაისვენონ”, – განაცხადა თბილისის მერმა კახა კალაძემ.
