გერმანიამ უახლოეს პერიოდში შესაძლოა საქართველო, ტუნისი, მაროკო და ალჟირი უსაფრთხო ქვეყნებად აღიაროს. როგორც Deutsche Welle წერს, გერმანიის მთავრობამ უკვე დაამტკიცა ეს კანონპროექტი, რომელიც საქართველოს უსაფრთხო ქვეყნად გამოცხადებას ითვალიინებს. დოკუმენტი განსახილველად ბუნდესტაგს გადაეგზავნება. ხელისუფლება იმედოვნებს, რომ ახალი ზომები თავშესაფრის მსურველი მიგრანტების მიერ შეტანილი დოკუმენტების დამუშავების პროცესს დააჩქარებს და ამ ქვეყნებიდან მიგრაციულ ნაკადს შეამცირებს.
შინაგან საქმეთა მინისტრის მოადგილე ნათია მეზვრიშვილი გერმანიის მიერ საქართველოს უსაფრთხო ქვეყნად გამოცხადებას გამოეხმაურა. მისი თქმით, თავშესაფრის მაძიებელთა რაოდენობის შემცირების მიმართულებით შინაგან საქმეთა სამინისტრომ აქტიური ქმედებები განახორციელა.
“უსაფრთხო ქვეყნების სიაში საქართველოს შეყვანის მნიშვნელობაზე შინაგან საქმეთა მინისტრმა, გერმანიის შს მინისტრი ან შეხვედრისას ისაუბრა. ამ შეხვედრიდან ძალიან მალე, გერმანიის მთავრობამ მიიღო გადაწყვეტილება, რომ საქართველო შეიყვანოს უსაფრთხო ქვეყნების სიაში და ეს მნიშვნელოვანია იმდენად, რამდენადაც თავშესაფრის მაძიებელთა რიცხვის შემცირებას უწყობს ხელს.“ – განაცხადა შინაგან საქმეთა მინისტრის მოადგილემ, ნათია მეზვრიშვილმა.
გერმანიის ლტოლვილთა და მიგრანტების ფედერალური ოფისის (BAMF) სტატისტიკის მიხედვით, 2018 წლის ივნისში საქართველოდან თავშესაფრის მიღების მსურველთა რაოდენობა მაისთან შედარებით გაიზარდა. ივნისში გერმანიაში ლტოლვილის სტატუსი 187-მა ადამიანმა მოითხოვა, მაისში კი – 176-მა ადამიანმა.
რაც შეეხება 2018 წლის იანვარ-ივნისის სტატისტიკას, BAMF-ის ინფორმაციით, 6 თვეში ლტოლვილის სტატუსი საქართველოს 2 450-მა მოქალაქემ მოითხოვა.
საქართველო უსაფრთხო ქვეყნების სიაში უკვე შეყვანილი ჰყავს ავსტრიას, საფრანგეთს, ბელგიას, ნიდერლანდებს, ბულგარეთს, ისლანდიას, ისრაელსა და ლუქსემბურგს.
ნინი მაზიაშვილი
