მოიმატებს თუ არა საწვავის ფასი ? – ამ კითხვით „თბილისი თაიმსმა“ რამდენიმე ნავთობკომპანიას მიმართა, სადაც განაცხადეს, რომ ამის პროგნოზი არ აქვთ და ეს სხვადასხვა ფაქტორზეა დამოკიდებული.
ლუკოილი:
„ეს არის მუდმივი პროცესი.ხდება გარდამავალი ნაშთების და ა.შ შეჯერება. მას შემდეგ, რაც შეჯერდება სურათი იმის, თუ რა ღირებულების ტვირთი გვაქვს ხელზე ამ წუთას, რას ველოდებით, როგორაა მათი თვითღირებულებები და ბევრი სხვა რამ, მოხდება გადაწყვეტილების მიღება : შეიძლება იყოს მატება, შეიძლება იგივე დარჩეს ან შეიძლება იყოს კლება. ამის შესახებ ჯერ არ გვიმსჯელია. შესაბამისად, მოიმატებს თუ არა ფასი, ამის ზეპირად განსაზღვრა ვერ მოხდება.“
რომპეტროლი:
„ჯერჯერობით პროგნოზი არ გვაქვს. მოიმატებს თუ არა საწვავის ფასი, ეს დამოკიდებულია ნავთობის როტაციასა და დოლარის კურსზე.“
ვისოლი:
„საწვავის ფასის დინამიკა პროგნოზირებადი არ არის. ის ყოველდღიურად დგინდება. მაგალითად, საერთაშორისო ბიულეტენის კლასის საფუძველზე, რომელიც ნავთობპროდუქტების ამოსავალი ფასია საერთაშორისო მასშტაბით, ყველა ნავთობკომპანიისთვის. ასევე ერთ-ერთი ფაქტორია სავალუტო ბირჟა, კურსის ცვლილებაც. ასე რომ, მოიმატებს თუ არა ფასი, ამის პროგნოზი არ გვაქვს.“
„ნავთობპროდუქტების იმპორტიორთა კავშირის“ განცხადებით, საქართველოში სექტემბრის თვეში ბრენდირებულ ავტოგასამართ სადგურებზე საწვავის ფასი გაიზარდა, საშუალოდ 5-8 თეთრით ლიტრაზე. როგორც მათ განცხადებაში ვკითხულობთ, ეს განპირობებული იყო „საერთაშორისო ფასების მატებიდან გამომდინარე და ბოლო პერიოდის განმავლობაში ლარის მკვეთრი ვარდნის გამო დოლართან მიმართებაში.”
„სექტემბრის თვეში საწვავის საშუალო ფასები საქართველოს საცალო ქსელში ბრენდირებულ გასამართ სადგურებზე შეადგენს: რეგულარი ტიპის ბენზინი – 2,34-2,52 ლარი/ლიტრაზე, პრემიუმი ტიპის ბენზინი – 2,47-2,60 ლარი/ლიტრაზე, სუპერი ტიპის ბენზინი – 2,57-2,68 ლარი/ლიტრაზე, ევრო დიზელის საწვავი – 2,50-2,64 ლარი/ლიტრაზე.“- ვკითხულობთ „ნავთობპროდუქტების იმპორტიორთა კავშირის“ განცხადებაში.
ნინი მაზიაშვილი
