სამეგრელოში, ხობში თანამედროვე სტანდარტების შესაბამისი ქართული სიმინდის მარცვლის გადამამუშავებელი, ზეთის მიმღები და კომბინირებული საკვების მწარმოებელი ქარხანა აშენდა. საწარმო თანამედროვე მანქანა-დანადგარებითა და ტექნიკით აღიჭურვა.
ქარხნის წარმოების ხაზისა და ტექნიკით აღჭურვის პროცესი „საპარტნიორო ფონდის“ აღმასრულებელმა დირექტორმა დავით საგანელიძემ, პრემიერ-მინისტრის მრჩეველმა რეგიონულ საკითხებში სოზარ სუბარმა, სამეგრელო-ზემო სვანეთის გუბერნატორმა ალექსანდრე მოწერელიამ და ადგილობრივი მუნიციპალიტეტის წარმომადგენლებმა დაათვალიერეს.
,სამეგრელოში მეტად გავრცელებული კულტურაა სიმინდი და ბუნებრივია, მისასალმებელია სიმინდის ზეთის მწარმოებელი ქარხნის ხობის მუნიციპალიტეტში დაფუძნება. წელს, სიმინდის ძალიან კარგი მოსავალი იყო და ვფიქრობ, ჩვენი თანამოქალაქეები აქტიურად შეუდგებიან წლების განმავლობაში დაუმუშავებელი მიწების გამოყენებასაც. ამის გათვალისწინებით, ქარხანას საჭირო ნედლეულის მარაგი ყოველთვის ექნება, რაც მნიშვნელოვნად გააუმჯობესებს რეგიონის მოსახლეობის ეკონომიკურ მდგომარეობას. ჩვენ მაქსიმალურად ხელს შევუწყობთ კიდევ უფრო მეტი გადამამუშავებელი საწარმოს დაარსებას, რაც ადგილობრივი მოსახლეობის დასაქმების გარდა, ფერმერული მეურნეობების განვითარებისთვის არის საჭირო.“ – განაცხადა ალექსანდრე მოწერელიამ.
საწარმო დღეში 50 ტონა სიმინდის მარცვლის გადამუშავებას შეძლებს და სრული წარმადობის შემთხვევაში, თვეში 100 ტონა სიმინდის ზეთს გამოუშვებს. ზეთის წარმოება ადგილობრივი ნედლეულით მოხდება.
საწყის ეტაპზე კომპანია სიმინდის ზეთით ადგილობრივ ბაზარს მოამარაგებს. ISO სერტიფიკატის აღების შემდეგ საქართველოში წარმოებული პროდუქტი ექსპორტზე გავა. კომპანიას რამდენიმე ძირითადი პროდუქტი ექნება: სიმინდის ზეთი, კოპტონი და სიმინდის გულგამოცლილი მარცვალი. პროექტის ფარგლებში, ასევე, დაარსდა მეორე კომპნია – ,,კოლხური“, რომელიც ადგილობრივ ბაზარს ცხოველებისთვის განკუთვნილი კომბინირებული საკვებით მოამარაგებს. საწარმოებში, ჯამში, 120-ზე მეტი ადგილობრვი დასაქმდება.
საპარტნიორო ფონდის“ და კომპანია „ქარვა კოლხურის“ ერთობლივი პროექტით, საქართველოში პირველად სიმინდის ზეთისა და კომბინირებული საკვების უნარჩენო წარმოება იწყება. ქართული სიმინდის ზეთი „ქარვა“ ადგილობრივ ბაზარზე 2019 წლიდან გამოჩნდება. პროექტის საინვესტიციო მოცულობა 3 მილიონი აშშ დოლარია.
პროექტიში ჩართულია სოფლის მეურნეობის პროექტების მართვის სააგენტო, ქართუ ბანკი და პროგრამა „აწარმოე საქართველოში“.
