თბილისში, დიდ დიღომში,ავთანდილის ქუჩაზე გუშინ საღამოს ცხრასართულიანი,ახალაშენებული საცხოვრებელი კორპუსის, მეექვსე სართულზე, სავარაუდოდ ბუნებრივი აირი აფეთქდა.
შემთხვევის შედეგად, ოთხი ადამიანი დაიღუპა,მათ შორის ერთი არასრულწლოვანი, რვა კი დაშავდა. ექვსი მცირეწლოვნიდან საავადმყოფოში ამ დროისთვის მხოლოდ ერთი რჩება. კლინიკა უკვე დატოვა ორმა მოზრდილმაც. აფეთქების შედეგად დაზარალებულები თბილისის მერიამ სასტუმროებში დააბინავა.
ადგილობრივების ცნობით, საცხოვრებელ კორპუსში გაზის სუნის გამო “ყაზტრანსგაზის” თანამშრომლები გამოიძახეს და მისვლის შემდეგ კი მათ თქვეს, რომ საშიში არაფერი იყო.
პირველადი ვერსიით, აფეთქება გაზის გაჟონვამ გამოიწვია.შინაგან საქმეთა სამინისტრომ გამოძიება სისხლის სამართლის კოდექსის 240¹-ე მუხლის მესამე ნაწილით დაიწყო. ამ მუხლით გაზის განლაგების, დაპროექტების ან ექსპლუატაციის დროს უსაფრთხოების წესების დარღვევა, რამაც ორი ან მეტი ადამიანის სიცოცხლე იმსხვერპლა ისჯება თავისუფლების აღკვეთით ვადით ექვსიდან ათ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
ამ დროისთვის დიდი დიღმის მეოთხე განყოფილებაში სამშენებლო კომპანიის „ელ ჯგუფის“ ხელმძღვანელის გიორგი ჭანტურიას გამოკითხვა მიმდინარეობს. „ელ ჯგუფი“ ის კომპანიაა, რომელმაც საცხოვრებელი კორპუსი ააშენა, სადაც გუშინ აფეთქება მოხდა. არსებული ინფორმაციით, გრძელდება ასევე მოქალაქეებისა და „ყაზტრანსგაზის“ წარმომადგენლების გამოკითხვა.
