საქართველოს ფინანსთა მინისტრი სსფ-ის დირექტორ-განმკარგულებლის მოადგილე მინ ჟუს შეხვდა.
სამინისტროს პრესსამსახურის ინფორმაციით, შეხვედრაზე საუბარი საქართველოს ძირითად მაკროეკონომიკურ პარამეტრებს, ეკონომიკური ზრდის ხელშეწყობისთვის აუცილებელ მექანიზმებსა და ამ მიმართულებით საერთაშორისო სავალუტო ფონდის რეკომენდაციებს შეეხო.
“ძალიან მნიშვნელოვანი შეხვედრა გვქონდა სსფ-ის დირექტორ-განმკარგულებლის მოადგილესთან. ვისაუბრეთ საქართველოს ეკონომიკაში არსებულ მდგომარეობაზე, მომავალი წლის საბიუჯეტო და მაკროეკონომიკურ პარამეტრებზე. შეხვედრა იყო კეთილგანწყობილი და მისიის წევრებს, რომლებიც საქართველოს ნოემბერში ესტუმრებიან, მან საქართველოს მთავრობასთან აქტიური მუშაობა დაავალა, რათა ერთობლივად ჩამოვაყალიბოთ მომავალი წლის ფისკალური და მაკროეკონომიკური პარამეტრები”, – განაცხადა ნოდარ ხადურმა.
როგორც ფინანსთა მინისტრმა აღნიშნა, საერთაშორისო სავალუტო ფონდის მხრიდან ქართულმა დელეგაციამ მხარდაჭერა მიიღო იმ პროექტებთან დაკავშირებით, რომლის განხორციელებასაც საქართველოს მთავრობა გეგმავს.
10.10.13
