პოლიციელების ძალიან დიდი რაოდენობა, რომელიც იქ იდგა, დარწმუნებული კი არ ვარ, უბრალოდ, ვიცი, რომ გულწრფელად თანაუგრძნობდა პროტესტანტებს, რადგან ბევრი მათგანი საოკუპაციო ხაზზე მსახურობს, – ამის შესახებ საქართველოს შინაგან საქმეთა მინისტრმა, გიორგი გახარიამ საქართველოს პირველი არხის ახალი და მიმდინარე ამბების ბლოკის დირექტორის, გიორგი გვიმრაძის დასმულ შეკითხვას უპასუხა.
გვიმრაძემ გახარიას ჰკითხა, გრძნობს თუ არა პასუხისმგებლობას შს მინისტრი, რომ ღონისძიებასთან დაკავშირებული რისკები არ იყო შეფასებული და გათვლილი, რა შეიძლებოდა მოყოლოდა მას.
„რა თქმა უნდა, უსაფრთხოების კომპონენტი იმაში, რაც მოხდა პარლამენტის შენობაში, პარლამენტის თავმჯდომარის ადგილიდან და შემდგომ, რაც ამას მოჰყვა, ჩვენ დღეს ვხედავთ, რომ ეს შესაძლებელია სპეციალური სამსახურების გამოძიების საგანი გახდეს, უნდა გახდეს. განსაკუთრებით მას შემდეგომ, რა განვითარებაც მოჰყვა ამ ქმედებას. თუმცა, აქვე მინდა აღვნიშნო, რომ ეს ორი სხვადასხვა კომპონენტია. არსებობს კომპონენტი, რამაც გამოიწვია თავისუფალი მოქალაქის სამართლიანი პროტესტი. პოლიციელების ძალიან დიდი რაოდენობა, რომელიც იქ იდგა, დარწმუნებული კი არ ვარ, უბრალოდ, ვიცი, რომ გულწრფელად თანაუგრძნობდა ამ პროტესტანტებს, რადგან ბევრი მათგანი მსახურობს საოკუპაციო ხაზზე. მათ ძალიან კარგად ესმით უსაფრთხოების და ოკუპაციის კომპონენტი რამდენად მნიშვნელოვანია და ემოციურადაც ძალზე მნიშვნელოვანია მათთვის. ამიტომ აქ არანაირი პრობლემა არ არსებობდა იმაში, რომ ისინი აბსოლუტურად თანაუგრძნობდნენ ამ პროტესტს.
ეს არის ერთი ნაწილი, რა იყო გათვლილი და რა მიზანს ემსახურებოდა ამ ღონისძიების მესვეურების ქმედების უკან, იყო თუ არა რამე გათვლები, რაც ქვეყნის უსაფრთხოებას შეუქმნიდნენ რისკებს. აბსოლუტურად სხვა საკითხია, რომელიც ასევე სამწუხაროდ, უსაფრთხოებას ეხება, ყველაფერი ის, რა სახეც მიიღო შემდგომ ამ პროტესტმა. ორივე კომპონენტი რა თქმა უნდა, განსახილველია უსაფრთხოების განზომილების თვალსაზრისით, თუმცა ვთვლი, რომ ეს არის სხვადასხვა კომპონენტი და ვერც ერთ შემთხვევაში, მე იმ პროტესტს, რომელიც ჩვენმა მოქალაქეებმა პარლამენტის წინ გამოხატეს, ვერ დავუკავშირებ უსაფრთხოების იმ შესაძლო რისკებს, რომელიც შესაძლებელია, ყოფილიყო რუსი დეპუტატის ქმედებების უკან. ეს სხვადასხვა რამეა. ასევე ხაზგასმით აღვნიშნავ, რა ფორმებიც მიიღო შემდეგ ამ პროტესტმა, ესეც ასევე, რა თქმა უნდა, ესეც ქვეყნის უსაფრთხოების კომპონენტს ძალზე სერიოზულად ეხება, ეს სხვა ფორმატში, მაგრამ ასევე განსახილველია“,- განაცხადა გახარიამ.
ამასთან, გვიმრაძის კითხვაზე, უსაფრთხოების საბჭოს ფორმატში რამდენად იყო ეს ყველაფერი გააზრებული, რამდენად იყო ეს რისკები აწონ-დაწონილი, ეკონომიკური თუ სხვა ტიპის პრობლემები და განიხილება თუ არა უსაფრთხოების საბჭოს ფორმატში, გახარიას თქმით, შექმნილი რისკებზე მსჯელობის საგანი უახლოეს პერიოდში გახდება.
„ახალი შექმნილი რისკები, რომლებიც ჩვენ წინაშეა და უკვე ყველა ვხედავთ, სამწუხაროდ, ჩვენი მოქალაქეებიც უკვე გრძნობენ, რა თქმა უნდა, ეს გახდება მსჯელობის საგანი უახლოეს პერიოდში. თუმცა, ასევე უნდა გავითვალისწინოთ, რომ ჯერ პროცესი არ არის დასრულებული. ჯერ თემები საკმაოდ ცხელია. პასუხისმგებლობა ერთმნიშვნელოვნად ეკისრება ჩვენს შესაბამის უწყებებსაც, მათ შორის უსაფრთხოების საბჭოსაც, თუმცა ეს არ იყო გაანალიზებული და არ ყოფილა განხილული. ამ ჭრილში სამწუხაროდ, ეს ღონისძიება, რომელიც ჩატარდა პარლამენტში, დანახული არ ყოფილა. ამას გეუბნებით გულწრფელად, რაც შესაძლებელია, იყოს შეცდომა ან არასაკმარისი ანალიზი, თუმცა ეს არის ფაქტი“, – განაცხადა გიორგი გახარიამ.
შს მინისტრი გიორგი გახარია ჟურნალისტებს ხვდება.
